باس قالادا توزىعى جەتكەن ۇيلەردىڭ ورنىنا «يلليۋزيا گۇلزارى» مەن «چەمودان ساياباعى» سالىندى دەپ حابارلايدى «ەلوردا اقپارات».
سارىارقا اۋدانىندا سالىنعان كرەاتيۆتى گۇلزارلار ءبىرجان سال كوشەسى, №5 ءۇي جانە رەسپۋبليكا داڭعىلى مەن ى.دۇكەنۇلى كوشەسىنىڭ قيىلىسىندا ورنالاسقان.
استانا قالاسى قورشاعان ورتانى قورعاۋ جانە تابيعاتتى پايدالانۋ باسقارماسى سۇرىلگەن ۇيلەردىڭ اۋماعى تولىعىمەن اباتتاندىرىلىپ, جارىقتاندىرىلعانىن ءمالىم ەتتى. مۇندا بالالارعا ارنالعان ويىن الاڭقايلارى جانە سپورت الاڭدارى پايدا بولدى. ءار گۇلزار وزىندىك ستيلدە بەزەندىرىلگەن.
رەسپۋبليكا داڭعىلى مەن ى.دۇكەنۇلى كوشەسىنىڭ قيىلىسىندا ورنالاسقان شاعىن ساياباق «يلليۋزيا گۇلزارى» دەگەن اتاۋعا يە. مۇندا سكەيتدروم, وپتيكالىق يلليۋزيانى جاساۋ ءۇشىن قولدانىلاتىن قيسىق فورماداعى ەيمس بولمەسى, سىرعاناق توبەشىگى جانە بالالار الاڭى بار.
ال ءبىرجان سال كوشەسى, №5 ءۇي مەكەنجايىندا ورنالاسقان گۇلزاردىڭ «چەمودان ساياباعى» دەپ اتالۋى تەگىن ەمەس. ساياباق تەمىرجول ۆوكزالىنا جاقىن ورنالاسقان. بۇل اۋماقتا چەمودان فورماسىندا جاسالعان كىشى ساۋلەت فورمالارى ورناتىلعان. جوبا اۆتورى بالالارعا ارنالعان تەمىرجول سالۋدى جوسپارلاعان. ال قۇرىلىسشىلار اۆتوردىڭ ويىن جۇزەگە اسىرۋ ءۇشىن ارنايى تەمىردەن رەلس جاسادى.
باسقارمانىڭ تابيعاتتى قورعاۋ جوبالارىن باسقارۋ ءبولىمىنىڭ باسشىسى ازامات جاناتاەۆتىڭ ايتۋىنشا, تۇرعىندار مەن قالا قوناقتارىنىڭ دەمالاتىن ورىندارىنا اينالعان جاڭا ساياباقتاردىڭ ورنىندا بۇرىن اپاتتىق جاعدايداعى ەكى قاباتتى ەسكى ۇيلەر بولعان.
بەلگىلى بولعانداي, بيىل قىركۇيەك ايىندا سارىارقا داڭعىلى, №27 ءۇيدىڭ ماڭىندا تاستارمەن كومكەرىلگەن گۇلزاردىڭ قۇرىلىسى اياقتالادى. باقتىڭ اۋماعى – 2304 شارشى مەتر. بۇل ايماق دەمالىسقا ارنالعان ءۇش الاڭعا بولىنەدى. ءبىر جاعىندا ءتۇرلى سپورتتىق جابدىقتارى بار سپورت الاڭى, ال ورتاسىندا الىپ تاستار بولادى. كەلەسى بولىگىندە تاماقتانۋ مەن ساۋدا پاۆيلوندارى اشىلادى دەپ جوسپارلانعان.
