سارىارقا اۋدانىنا – 20 جىل. اتالمىش اۋداننىڭ مەرەيتويى جاستار تەاترىندا كەڭ كولەمدە اتالىپ ءوتتى.
سالتاناتتى شارادا العاشقى بولىپ ءسوز العان استانا اكىمىنىڭ ورىنباسارى ەرمەك امانشاەۆ جينالعانداردى قالا باسشىسىنىڭ اتىنان استانانىڭ جانە سارىارقا اۋدانىنىڭ 20 جىلدىق مەرەيتويىمەن قۇتتىقتادى.
– ەلوردانىڭ 20 جىلدىق مەرەيتويى قۇتتى بولسىن! ەلباسىنىڭ ءتول تۋىندىسى بولىپ سانالاتىن استانا بۇگىندە مەملەكەتتىك ماڭىزى بار حالىقارالىق وقيعالاردىڭ ورتاسىنا اينالدى. ال مەملەكەت باسشىسىنىڭ جارلىعىمەن العاشقى بولىپ قۇرىلعان مۇنداعى سارىارقا اۋدانى – قازىرگى ۋاقىتتا دا الەۋمەتتىك-ەكونوميكالىق, ساياسي جاعىنان ەلوردانىڭ ماڭىزدى بولىگى. اۋداندا ۇلكەن جۇمىستار اتقارىلدى. ءالى دە كوركەيە بەرسىن, – دەگەن ەرمەك امانشاەۆ استانانىڭ دامۋىنا, سارىارقا اۋدانىنىڭ وركەندەۋىنە ۇلەس قوسقان اعا بۋىن وكىلدەرىنە ءوزىنىڭ زور ريزاشىلىعىن ءبىلدىردى.
ال ءوز كەزەگىندە بايانداما جاساعان سارىارقا اۋدانىنىڭ اكىمى ارمان تۇرلىبەك ەلباسى مەن ەلوردانىڭ ەگىز ۇعىم ىسپەتتى ەكەنىن اتاپ ءوتىپ, اۋدانداعى اتقارىلعان قىرۋار جۇمىستارعا توقتالدى.
جيىن بارىسىندا اۋدان جايلى بەينەروليك كورسەتىلىپ, جينالعاندارعا سارىارقا اۋدانى تۋرالى جاڭا كىتاپ تاراتىلدى. سالتاناتتى شارا سوڭى «سارىارقا», «ك7» توپتارى مەن جەڭىس ىسقاق, ەرلان مالاەۆ, مارجان اراپباەۆا جانە قايرات نۇرتاس سىندى ونەر جۇلدىزدارىنىڭ كونتسەرتىنە ۇلاستى.
