ەلورداسى – نۇر-سۇلتان قالاسىندا شاعىن جانە ورتا بيزنەستى دامىتۋعا جان-جاقتى قولداۋ كورسەتىلىپ كەلەدى. بۇگىنگى تاڭدا ەلوردانىڭ شاعىن جانە ورتا كاسىپكەرلىك سالاسى قالاداعى وڭىرلىك جالپى ءونىمنىڭ 66,9 پايىزىن قامتاماسىز ەتەدى. بۇل سەكتوردا ەكونوميكالىق جاعىنان بەلسەندى ازاماتتاردىڭ 68 پايىزى جۇمىس ىستەيدى. كاسىپكەرلىك وركەندەگەن جەردە بەرەكەنىڭ ەسىگى اشىلاتىنىن ەسكەرگەن قالا باسشىلىعى وسى باعىتتا بىرقاتار ءتيىمدى جوبالاردى جۇزەگە اسىرىپ وتىر.
نۇر-سۇلتان قالاسىنىڭ اكىمى التاي كولگىنوۆ كاسىپكەرلەرمەن «اشىق ميكروفون» فورماتىندا كەزدەسۋ وتكىزدى. جيىندا اكىمشىلىك كەدەرگىلەردى قىسقارتۋ, قۇرىلىس سالاسىن دامىتۋ, قالانىڭ ديزاين-كودى, جەر ۋچاسكەلەرى مەن ينجەنەرلىك جەلىلەر, جوبالاردى قارجىلاندىرۋ جانە تاعى باسقا وزەكتى ماسەلەلەرگە قاتىستى كاسىپكەرلەردى تولعاندىرعان بارلىق ساۋالدارعا جاۋاپ بەرىلدى.
كەزدەسۋگە «اتامەكەن» ۇكپ, قالانىڭ قۇقىق قورعاۋ جانە قاداعالاۋ ورگاندارىنىڭ, سالالىق قاۋىمداستىقتاردىڭ, ادۆوكاتتىق زاڭ قاۋىمداستىعىنىڭ باسشىلىعى, كاسىپكەرلەر قاتىستى.
«قالا ەكونوميكاسىنىڭ نەگىزىن شاعىن جانە ورتا بيزنەس قۇرايدى. ەلوردادا ءتۇرلى سەكتورلار بويىنشا جۇمىلدىرىلعان جانە 500 مىڭعا جۋىق قالا تۇرعىنى جۇمىس ىستەيتىن 180 مىڭعا جۋىق بيزنەس سۋبەكتىسى بار. تۇرعىندار ولاردىڭ قىزمەتىن كۇن سايىن پايدالانادى. ولاردىڭ اراسىندا قوعامدىق تاماقتانۋ, تۇرمىستىق قىزمەت كورسەتۋ, سول سياقتى قۇرىلىس, مەديتسينا, ءبىلىم بەرۋ سالالارى جانە تاعى باسقالار بار. سول سەبەپتى ەلوردانىڭ بيزنەس احۋالىن ودان ءارى جاقسارتۋ تەتىكتەرى اسا ماڭىزدى» دەدى جيىندا قالا باسشىسى.
التاي كولگىنوۆ مەملەكەت باسشىسىنىڭ شاعىن جانە ورتا بيزنەستى دامىتۋ ءۇشىن ءتيىستى جاعداي جاساۋعا جانە قالا مەن ەلدى دامىتۋعا جەكە ينۆەستيتسيالار تارتۋعا ەرەكشە كوڭىل بولەتىنىن اتاپ ءوتتى. «اكىمدىك تاراپىنان بيزنەس وكىلدەرىنە جۇيەلى قولداۋ كورسەتۋ ءۇشىن بىرقاتار ءىس-شارالاردى جۇزەگە اسىردىق. بيزنەستى, اسىرەسە شاعىن جانە ورتا كاسىپكەرلىكتى قولداۋدىڭ ايتۋلى تەتىكتەرىنىڭ ءبىرى – «Astana اكك» اق قىزمەتى بولىپ سانالادى. الەۋمەتتىك-كاسىپكەرلىك كورپوراتسيا كاسىپكەرلەرگە بيۋروكراتيالىق كەدەرگىسىز جەر ۋچاسكەلەرىن, ارنايى ەكونوميكالىق ايماق اۋماعىندا «Astana Invest» جانە يندۋستريالىق پارك ارقىلى جەڭىلدىكتى پرەفەرەنتسيالار بەرۋگە مۇمكىندىك بەرەدى. بۇل شارالار داعدارىس كەزەڭىندە ەرەكشە جانە ماڭىزدى ءرول اتقاردى» دەدى اكىم.
سونداي-اق قالا باسشىسى ءارتۇرلى باعدارلامالار ارقىلى گرانتتار مەن جەڭىلدەتىلگەن نەسيەلەر بەرىلەتىنىن تىلگە تيەك ەتتى. «ماسەلەن, بيىل جاڭا بيزنەس-يدەيالاردى ىسكە اسىرۋ ءۇشىن 130-دان اسا گرانت بەرىلدى, بۇل وتكەن جىلمەن سالىستىرعاندا 2 ەسەگە كوپ. شاعىن جانە ورتا بيزنەس نىساندارىنا ينجەنەرلىك جەلىلەر جۇرگىزۋ بويىنشا قولداۋ كورسەتەمىز, بيزنەس شىعىندارىن ازايتۋ جانە قولداۋ ءۇشىن قاجەتتى ينفراقۇرىلىم جاسايمىز. بۇگىندە «iQala» قالالىق قىزمەتتەر ورتالىعى, ينۆەستورلارعا ارنالعان «Astana Invest» فرونت-كەڭسەسى جانە تاعى باسقالار تابىستى جۇمىس ىستەۋدە» دەپ اتاپ ءوتتى ەلوردا اكىمى.
