قازاقستان حالقىنىڭ بىرلىگى كۇنى نۇر-سۇلتان قالاسىندا 417 وتباسى ءۇيلى بولدى. جاڭا پاتەرلەردىڭ كىلتىن قالا اكىمى باقىت سۇلتانوۆ ءوز قولىمەن تاپسىردى. جۇرت كوڭىلىنە شۋاق, جۇرەگىنە قۋات سىيلاعان شارادا الدىمەن قالا تۇرعىندارىن مەرەكە كۇنىمەن قۇتتىقتاپ, پاتەر يەلەرىنە قۇتتى بولسىن ايتقان قالا باسشىسى «بىرلىك پەن بەرەكەنى تۋ ەتكەن ەلىمىزدە ءاردايىم قۋانىش كوپ بولسىن. ءار شاڭىراقتان ءسابيدىڭ كۇلكىسى ۇزىلمەسىن» دەپ اق تىلەۋىن ءبىلدىردى.
نۇر-سۇلتان شاھارىندا قالا اكىمدىگىنىڭ تاپسىرىسىمەن سالىنعان ا98 جانە ە496 كوشەلەرىندە كوپ قاباتتى تۇرعىن ءۇي كەشەندەرى پايدالانۋعا بەرىلدى. «نۇرلى جەر» تۇرعىن ءۇي قۇرىلىسى باعدارلاماسىن ىسكە اسىرۋ ماقساتىندا «تۇرعىن ءۇي قۇرىلىس جيناقتارى جۇيەسى ارقىلى كرەديتتىك تۇرعىن ءۇي سالۋ» جانە «ساتىپ الۋسىز جالعا بەرىلەتىن تۇرعىن ۇيمەن قامتۋ» جۇيەسى اياسىندا تۇرعىزىلعان بۇل تۇرعىن ءۇي كەشەندەرىندەگى ءار پاتەردىڭ شارشى مەترى – 180 مىڭ تەڭگە. بۇل نارىقتىق باعادان الدەقايدا تومەن.
ە496 كوشەسىندەگى تۇرعىن ءۇي كەشەنىنەن بەرىلگەن 364 پاتەردىڭ 182-ءسى كەزەكتە تۇرعان كوپبالالى انالارعا, مەملەكەتتىك قىزمەتكەرلەر مەن بيۋدجەتتىك ۇيىمداردىڭ قىزمەتكەرلەرىنە بۇيىردى. ال ا98 كوشەسىندەگى تۇرعىن ءۇي كەشەنىنەن بەرىلگەن 53 ءۇيدىڭ 10-ى كوپبالالى انالارعا ءبولىندى.
الەۋمەتتىك قولداۋ شارالارى تۋرالى توقتالعان قالا اكىمى ب.سۇلتانوۆ بيىل جىل سوڭىنا دەيىن الەۋمەتتىك تۇرمىس دەڭگەيى ءتومەن وتباسىلارعا 1800-1900 پاتەر بولەتىنىن جانە كەزەكتىڭ جىلدام جىلجيتىنىن ايتقان ەدى. ەندى, مىنە, سول جوسپاردىڭ الدى ورىندالىپ, باسپاناعا مۇقتاج جانداردىڭ باستى ماسەلەسى شەشىلىپ, مەرەكە كۇنى بەرەكەگە كەنەلگەن جۇرت ارقا-جارقا قۋانىپ جاتىر.
كىلت تاپسىرۋدان كەيىن قالا باسشىسى جاڭا تۇرعىن ءۇيدىڭ اۋلاسىندا اعاش وتىرعىزۋ راسىمىنە قاتىستى.
ايتا كەتەيىك, بيىل نۇر-سۇلتان قالاسىندا جالپى اۋدانى 141,8 مىڭ شارشى مەتردى قۇرايتىن 1,9 مىڭ پاتەرى بار جەتى تۇرعىن ءۇيدى پايدالانۋعا بەرۋ جوسپارلانعان.
بۇگىنگى تاڭدا باس قالامىزدا 45748 ادام ءۇي كەزەگىندە تۇر.
