بيىل ۇبت رەسپۋبليكا بويىنشا 20 ماۋسىم مەن 5 شىلدە ارالىعىندا ساعات تاڭعى 9-دان تۇسكى 12.30-عا دەيىن ۇيىمداستىرىلادى. ال تەستىلەۋدىڭ نۇر-سۇلتان قالاسىندا قاشان وتەتىنى تۋرالى اقپارات ماۋسىم ايىنىڭ باسىندا حابارلانادى. بۇل تۋرالى ەلوردا اكىمى باقىت سۇلتانوۆتىڭ توراعالىعىمەن وتكەن اپپارات جينالىسىندا ايتىلدى.
بيىلعى وزگەرىستەر قانداي؟
جيىن بارىسىندا ەلوردالىق ءبىلىم باسقارماسىنىڭ باسشىسى ءانۋار جانعوزين ۇبت-نىڭ وسى جىلعى جاڭالىقتارىنا توقتالدى. ەندى جوعارى وقۋ ورنىنا ءتۇسۋ ءۇشىن مەكتەپ تۇلەكتەرىنىڭ ءبىر ەمەس, ءتورت مارتە ۇبت تاپسىرۋعا مۇمكىندىگى بار. ءار تەستىلەۋدىڭ باعاسى – 2242 تەڭگە.
كەلەسى وزگەرىس حالىقارالىق سەرتيفيكاتتارى بار تۇلەكتەرگە قاتىستى. ەگەر شاكىرتتىڭ قولىندا اعىلشىن ءتىلىن بىلەتىنىن راستايتىن حالىقارالىق سەرتيفيكات بولسا, وندا ول شەتەل ءتىلى ءپانى بويىنشا ۇبت تاپسىرۋدان بوساتىلادى.
ال تەستىلەۋ فورماسى بۇرىنعىشا ساقتالادى: ۇبت 2 كەزەڭگە بولىنەدى, ونىڭ ارقايسىسىندا 20 تاپسىرمادان تۇراتىن 3 مىندەتتى ءپان مەن 30 تاپسىرمادان تۇراتىن 2 بەيىندى ءپان قامتىلادى.
تەستىلەۋ ورىندارى قايدا بولادى؟
استانالىق وقۋشىلار ءۇشىن ۇبت ل.گۋميلەۆ اتىنداعى ەۋرازيا ۇلتتىق ۋنيۆەرسيتەتى, س.سەيفۋللين اتىنداعى قازاق اگروتەحنيكالىق ۋنيۆەرسيتەتى جانە قازاق ەكونوميكا, قارجى جانە حالىقارالىق ساۋدا ۋنيۆەرسيتەتى عيماراتىندا – بارلىعى 30 اۋديتوريادا وتكىزىلەدى. اتالعان 3 وقۋ ورنىندا دا قاتىسۋشىلار تۋرالى مالىمەتتەر بازاسى بار, سونداي-اق سايكەستەندىرۋ كودىن بەرۋ ءتارتىبى جۇرگىزىلگەن, مۇنىمەن قوسا قاجەتتى قۇرال-جابدىقتارمەن جاساقتالعان. ۇبت تاپسىراتىن تۇلەكتەردىڭ ءتىزىمى 10 مامىرعا دەيىن قۇرىلادى.
قالالىق ءبىلىم باسقارماسىنىڭ باسشىسى ەرەكشە قاداپ ايتقان تاعى ءبىر جايت, ۇبت-نى تاپسىرۋ كەزىندە تۇلەكتەر تالاپكەر بولىپ ەسەپتەلەدى, سوندىقتان ولاردى تەستىلەۋ پۋنكتتەرىنە جەتكىزۋ مەكتەپ مۇعالىمدەرىنىڭ ەمەس, اتا-انانىڭ مىندەتى بولۋى كەرەك.
2019 جىلى ورتا ءبىلىم بەرەتىن مەكتەپتى 6274 تۇلەك بىتىرمەك, ونىڭ 5856-سى ۇبت-عا قاتىسادى. شامامەن 400-دەي شاكىرت ۇبت تاپسىرۋدان بوساتىلعان, ويتكەنى ولاردىڭ كوبى وتاندىق جانە شەتەلدىك جوعارى وقۋ ورىندارىنا شاقىرتۋ الىپ قويعان.
مەكتەپ ءبىتىرۋ كەشى قاشان وتەدى؟
بۇلاردان بولەك, سالتاناتتى جيىندار مەن مەكتەپ ءبىتىرۋ كەشتەرىن وتكىزۋ ماسەلەسى دە تالقىلاندى. «سوڭعى قوڭىراۋ» – جىلداعى ءداستۇر بويىنشا 25 مامىردا, قورىتىندى اتتەستاتسيا – 28 مامىر مەن 7 ماۋسىم ارالىعىندا, ال مەكتەپ ءبىتىرۋ كەشتەرى, ءبىلىم جانە عىلىم مينيسترلىگىنىڭ كەلىسىمىنە سايكەس, 12 ماۋسىمعا بەلگىلەنگەن.
ءوز كەزەگىندە شاھار باسشىسى باقىت سۇلتانوۆ اۋدان اكىمدەرىنە ۇبت پۋنكتتەرى اۋماعىندا ءتيىستى جاعداي جاساۋدى, ال پوليتسيا دەپارتامەنتى مەن قوعامدىق دەنساۋلىق ساقتاۋ باسقارماسىنا لايىق كەزەكشىلىك اتقارۋدى تاپسىردى. ءبىلىم باسقارماسى وكىلدەرىنە مەكتەپ باسشىلارىمەن تۇسىندىرمە جۇمىستار جۇرگىزۋ, تۇلەكتەردىڭ ۇبت-عا قاتىسۋىن قاداعالاۋ مىندەتتەلدى. سونىمەن قاتار مەكتەپ ءبىتىرۋ كەشتەرىن ىسىراپسىز
وتكىزۋدى باقىلاۋ جانە بالالاردىڭ قاۋىپسىزدىگى ماقساتىندا سول كەشتەر بولاتىن ورىنداردا كەزەكشىلىك ۇيىمداستىرۋ ايرىقشا تاپسىرما رەتىندە بەرىلدى.
