قازاقستان حالقى بىرلىگى كۇنى مەرەكەسىنە وراي بوتانيكالىق باقتا الما اعاشتارى وتىرعىزىلدى.
قازاقستان حالقى اسسامبلەياسىنىڭ ۇيىمداستىرۋىمەن وتكەن شاراعا پرەمەر-مينيستر اسقار مامين مەن ەلوردا اكىمى باقىت سۇلتانوۆ قاتىستى. جاس كوشەتتەردى وتىرعىزعان ەتنومادەني ورتالىقتاردىڭ بەلسەندىلەرى وزدەرى ەككەن الما اعاشتارىنىڭ تۇسىنا ەستەلىك رەتىندە بىرلەستىكتىڭ اتىن جازىپ قويدى.
جالپى, شارا بارىسىندا بوتانيكالىق باقتىڭ قابانباي باتىر داڭعىلى جاعىنداعى كىرەبەرىس قاقپاسىنىڭ الدىنا اتىراۋدان اكەلىنگەن 800 ءتۇپ الما اعاشى وتىرعىزىلدى. ونىڭ 700 ءتۇبى بۇرىننان بەلگىلى سۇرىپتار بولسا, قالعان 100 ءتۇپ – جاڭا سۇرىپ.
– اتىراۋدىڭ ماحامبەت اۋدانىنداعى «اگرو ونىمدەرى» ءتالىم-باعىندا المالاردى بۋدانداستىرۋ جۇرگىزىلەدى. سول جەردە قىستىڭ ايازىنا دا توتەپ بەرەتىن جاڭا سۇرىپتى ويلاپ شىعاردىق. قىپ-قىزىل بولىپ وسەتىن بۇل الماعا ەلوردانىڭ سۋىعى ەش اسەر ەتپەيتىن بولادى. ونى ءبىز ەلباسى مەن ەلوردانىڭ قۇرمەتىنە «نۇر-سۇلتان» دەپ اتادىق. ويتكەنى تۇڭعىش پرەزيدەنتتىڭ اكەسىنىڭ باعبان بولعانىن بىلەسىزدەر. ەلباسى سۇحباتتارىنىڭ بىرىندە بالا كۇنىندە اكەسىنە كومەكتەسىپ, الما اعاشتارىن وتىرعىزعانىن ايتقان بولاتىن, – دەيدى اتىراۋ قالاسىنداعى «سارايشىق» شارۋا قوجالىعىنىڭ باسشىسى تاميلا روزمەتوۆا.
ونىڭ ايتۋىنشا, بۇل الما اعاشتارى 2 جىلدان كەيىن جەمىس بەرە باستايدى. وسى جەردەگى 1 گەكتار جەردە 20 توننا الما وسەدى دەپ جوسپارلانۋدا.
