ۇلتتىق مۋزەيدە باتىس قازاقستان وبلىستىق تاريحي-ولكەتانۋ مۋزەيىنىڭ ۇيىمداستىرۋىمەن جايىق بويىنداعى قىلقالام شەبەرلەرى تۋىندىلارىنان توپتاسقان «جازيرا – جايىق» اتتى كورمە اشىلدى.
ورال ءوڭىرى – ەۋروپا مەن ازيانىڭ توعىسقان جەرى. سوندىقتان دا بۇل جەردە بەينەلەۋ ونەرى ەرتەدەن قانات جايعان. بۇگىندە ايماقتا قازاقستان سۋرەتشىلەر وداعىنىڭ 30-عا تارتا مۇشەسى بار. ولار بەينەلەۋ ونەرىنىڭ گرافيكا, كەسكىندەمە, ساندىك-قولدانبالى جانە ءمۇسىن جانرلارى بويىنشا جۇمىس ىستەيدى. قازىر ورالدىق قىلقالام شەبەرلەرىنىڭ كارتينالارى رەسپۋبليكالىق, حالىقارالىق كورمەلەرگە قويىلىپ, بىلىكتى سىنشىلار تاراپىنان جوعارى باعالانىپ ءجۇر. سونداي-اق سوڭعى ون جىلدان بەرى «جازيرا – جايىق» اتاۋىمەن ايماق سۋرەتشىلەرىنىڭ ەلىمىزدىڭ اقتوبە, اتىراۋ, الماتى شاھارلارى مەن رەسەيدىڭ ۋفا, سامارا قالالارىندا كورمەسى ۇيىمداستىرىلعان.
كورمەگە قويىلعان تۋىندىلار اراسىندا ومىردەن ەرتە وتكەن ءبىتىمى بولەك سۋرەتشى ساكەن عۇماروۆتىڭ كارتينالارى وزگەشە ورنەگىمەن, توسىن قۇبىلىسىمەن كورەرمەندەردى تاڭعالدىردى. ساكەن اعامىزدىڭ بار عۇمىرى تۋعان جەرىندە ءوتتى. الەمدىك بەينەلەۋ ونەرىنىڭ تالاي تۇلعالارىن دۇنيەگە اكەلگەن بۇگىنگى سانكت-پەتەربۋرگ قالاسىندا ءبىلىم العان. ونىڭ جۇمىستارى وزىمىزگە عانا ەمەس, باسقا ەلدەرگە دە جاقسى تانىس. كوزى تىرىسىندە ماسكەۋ, يالتا, كيەۆ, سوچي, الماتى سەكىلدى شاھارلاردا كورمەسى ءوتتى. عۇماروۆتىڭ كارتينالارىن سۋرەتشىلىك جانرداعى ەشقانداي مەكتەپ, اعىمعا سىيعىزا المايسىز. ول ءوز ەڭبەكتەرىن ابستراكتسيالىق ۇلگىدە جازادى. ونىڭ قازاق قالامگەرلەرى شىعارمالارىنداعى جانە حالىق اۋىز ادەبيەتىندەگى قۇستار بەينەسىن نەگىزگە الا وتىرىپ سالعان «اققۇس» توپتاماسىن ەرەكشەلەپ ايتۋعا بولادى. تۇيىندەپ ايتقاندا, جادىراپ اققان جايىق بويىنان كەلگەن سۋرەتشىلەردىڭ ەڭبەكتەرىنەن وتكەن عاسىر مەن كەلەشەك اراسىنداعى رۋحاني ۇندەستىك شەبەر ورىلگەن.
