قازاقستان رەسپۋبليكاسى كاسىپوداقتار فەدەراتسياسى عيماراتىنىڭ الدىندا قالالىق ەڭبەك فورۋمى ءوتتى.
ادام ەڭبەگىنىڭ بەدەلىن ارتتىرىپ, جۇمىسشى ماماندىقتارىن ناسيحاتتاۋعا, ءوندىرىس سالاسىنا جاستاردى تارتۋعا جانە جۇمىسشى اۋلەتىندەگى كوپ جىلدىق ءداستۇردى نىعايتۋعا باعىتتالعان شاراعا استانا قالاسى ءماسليحاتىنىڭ حاتشىسى سانسىزباي ەسىلوۆ, قازاقستان رەسپۋبليكاسى كاسىپوداقتار فەدەراتسياسىنىڭ توراعاسى ءابىلعازى قۇسايىنوۆ جانە قالالىق ءماسليحات دەپۋتاتتارى, اتقارۋشى جانە وكىلەتتى ورگانداردىڭ وكىلدەرى, ۇكىمەتتىك ەمەس ۇيىمداردىڭ جەتەكشىلەرى قاتىستى.
فورۋمعا قاتىسۋشىلار قازاقستاننىڭ يگىلىگى ءۇشىن تابىستى ەڭبەك ەتىپ جۇرگەن ءاربىر ەلوردالىقتىڭ ازاماتتىق بەلسەندىلىك تانىتىپ, قوعامداعى كەلىسىم مەن بەيبىتشىلىكتى قولداۋعا ۇندەدى. سونىمەن بىرگە, ەلوردانىڭ بارلىق مەكەمەلەرىندە ەڭبەكشىلەر اۋلەتىن, ەڭبەك ارداگەرلەرىن, تالىمگەر-جەتەكشىلەر مەن جاس مامان قىزمەتكەرلەردى بارىنشا قولداۋعا, ولارعا قۇرمەت كورسەتۋگە شاقىردى.
– بيىل العاش رەت, 28 قىركۇيەكتە اتاپ وتكەلى وتىرعان ەڭبەك كۇنى قارساڭىندا وسىنداي شارالار ءاربىر ەڭبەك ۇجىمىندا ءوتۋى كەرەك. ال, ەڭبەك ادامى – ەلىمىزدىڭ قۋاتىن ارتتىرىپ, جاڭا تەحنيكا مەن تەحنولوگيانى ەنگىزىپ, مەڭگەرۋدىڭ نەگىزگى بۋىنى, ازاماتتىق قوعامدى جاساۋدىڭ بەلسەندى مۇشەسى بولىپ تابىلادى. سول سەبەپتى بارلىق قۇرمەت ەڭبەك ادامىنا ارنالۋى كەرەك, – دەدى استانا قالاسى كاسىپوداقتار كەڭەسىنىڭ توراعاسى سارسەنباي مىڭباەۆ.
ەلوردا ەكونوميكاسىنىڭ سان-سالاسىندا ەڭبەك ەتىپ جاتقان ۇزدىك جۇمىسكەرلەردى ماراپاتتاعان بۇقارالىق شارا استانا قالاسى كوڭىلدى تاپقىرلار تەاترىنىڭ جانە مەملەكەتتىك فيلارمونياسى انشىلەرىنىڭ كونتسەرتى مەن سپورتتىق جارىستارىنا ۇلاستى.
ايگۇل ۋايسوۆا
