جەمقوردىڭ جولى كەسIلەدI
تاۋەلسىزدىك سارايىندا دەموكراتيالىق كۇشتەردىڭ «قازاقستان-2050» جالپىۇلتتىق كواليتسياسىنىڭ وتىرىسى ءوتىپ, وندا سىبايلاس جەمقورلىققا قارسى 2025 جىلعا دەيىنگى ۇلتتىق ستراتەگيا العاش رەت تانىستىرىلدى.
جيىندى اشقان ءارى جۇرگىزىپ وتىرعان «نۇر وتان» پارتياسى توراعاسىنىڭ ءبىرىنشى ورىنباسارى باۋىرجان بايبەك سىبايلاس جەمقورلىقپەن كۇرەس – وزەكتى ماسەلە ەكەنىن, وسىعان بايلانىستى مەملەكەتتىك دەڭگەيدە كەشەندى شارالار قولعا الىنعانىن اتاپ ءوتتى. اتاپ ايتقاندا, اكىمشىلىك كەدەرگىلەردى ازايتۋ شارالارى بەلسەندى جولعا قويىلعان. كاسىپكەرلىك سالاسىن تەكسەرۋگە موراتوري جاريالانۋدىڭ ءوزى – جەمقورلىقتى تەجەۋدىڭ ءبىر تەتىگى. بۇگىنگى ۋاقىتتا ستاندارتتاۋ, رەتتەۋ جانە باقىلاۋ جولى ارقىلى مەملەكەتتىك ورگانداردىڭ قاراپايىم ازاماتتارعا كورسەتەتىن قىزمەتىنىڭ ساپاسى ەداۋىر ارتىپ, «ەلەكتروندىق ۇكىمەت» پەن حقو ارقىلى «ءبىر تەرەزە» قاعيداتىمەن تۇرعىندارعا قىزمەت كورسەتۋ ءتيىمدى ەكەنى دالەلدەنىپ وتىر. ەندى 2015 جىلدان باستاپ كاسىپورىنداردى جوسپارلى تەكسەرۋگە دە تىيىم سالىنباق. بۇعان قوسا, كەلەسى جىلى كۇشىنە ەنەتىن قىلمىستىق كودەكستە جەمقورلىق قىلمىسى ءۇشىن شارتتى جازا قولدانۋدى توقتاتىپ, جەمقورلىق قىلمىس جاساعان تۇلعالاردى مەملەكەتتىك قىزمەتكە قايتا ورالۋعا ءومىر بويى تىيىم سالۋ امالدارى قاراستىرىلىپ وتىر.
جيىندا سويلەگەن قر پرەمەر-ءمينيسترىنىڭ ءبىرىنشى ورىنباسارى باقىتجان ساعىنتاەۆتىڭ ايتۋىنشا, بيىل جىلدىڭ اياعىنا دەيىن حالىققا كورسەتىلەتىن مەملەكەتتىك قىزمەتتەر تۇگەل اۆتوماتتاندىرىلعان جۇيەگە كوشەدى. بيزنەس سالاسىن ءجونسىز تەكسەرۋ كەلەشەكتە سىبايلاس جەمقورلىق دەرەگى رەتىندە قارالۋى مۇمكىن. كاسىپكەرلىك بويىنشا تەكسەرىستەر تەك ارىز-شاعىمدار بويىنشا عانا جۇرگىزىلەتىن بولادى.
بيىلعى شىلدەدە «نۇر وتان» پارتياسى سىبايلاس جەمقورلىققا قارسى ءىس-قيمىل باعدارلاماسىنىڭ جوباسىن ازىرلەپ, قالىڭ بۇقارانىڭ تالقىلاۋىنا ۇسىنعانى بەلگىلى. بۇل جونىندە باعدارلامانى ازىرلەگەن جۇمىسشى توبىنىڭ جەتەكشىسى, قر پارلامەنتى ماجىلىسىندەگى «نۇر وتان» پارتياسى فراكتسياسىنىڭ مۇشەسى نۇرلان ءابدىروۆ اڭگىمەلەپ بەردى. پارتيا قاتارىنداعى سىبايلاس جەمقورلىققا قارسى ءىس-قيمىلدىڭ مەحانيزمى تۋرالى «نۇر وتان» پارتياسى قاراماعىنداعى سىبايلاس جەمقورلىققا قارسى ءىس-قيمىل جونىندەگى رەسپۋبليكالىق قوعامدىق كەڭەستىڭ توراعاسى قايىربەك سۇلەيمەنوۆ مالىمدەدى. بەلگىلى بولعانداي, باعدارلاما جوباسى التى مىڭنان استام الاڭدا تالقىلانىپ, وعان 800 مىڭنان استام قازاقستاندىق قاتىسقان. بارلىعى 800-دەن استام ۇسىنىستار مەن تولىقتىرۋلار تۇسكەن ەكەن.
سىبايلاس جەمقورلىققا قارسى بۇل پارتيالىق باعدارلاما جاقىن ۋاقىتتا پارتيانىڭ ساياسي كەڭەسىنىڭ وتىرىسىندا قابىلدانباقشى.
جيىن قورىتىندىسىندا دكجك مۇشەلەرى كواليتسيا اتىنان بارلىق قازاقستان ازاماتتارىنا ارناعان ۇندەۋ قابىلدادى.
ەستەرىڭىزگە سالا كەتەيىك, ەلىمىزدەگى جەتى پارتيانى بىرىكتىرگەن «قازاقستان 2050» دەموكراتيالىق كۇشتەردىڭ جالپىۇلتتىق كواليتسياسى «نۇر وتان» پارتياسىنىڭ باستاماسىمەن 2009 جىلى قۇرىلعان بولاتىن.
2010 جىلدىڭ جەلتوقسانىندا كەڭەس قۇرامىنا ەلىمىزدەگى ون التى ۇكىمەتتىك ەمەس ۇيىم كىردى. ولاردىڭ قاتارىندا: قازاقستان كاسىپوداقتار فەدەراتسياسى, «اتامەكەن» ۇلتتىق كاسىپكەرلەر پالاتاسى, «قازاقستاننىڭ ازاماتتىق اليانسى» جانە تاعى باسقالار بار.
جالپى, كواليتسيا ەلباسىنىڭ قازاقستان حالقىنا جولداۋلارىندا جانە باسقا دا باعدارلامالىق قۇجاتتارىندا باياندالعان ماسەلەلەردى ءتيىستى ورگاندار ءتيىمدى شەشۋى ءۇشىن ۇسىنىستار ازىرلەۋگە باعىتتالعان.
قىمبات نۇرعالي