كاسىپوداق مۇشەلەرى ەلورداداعى بەلسەندى قىزمەتى ءۇشىن ماراپاتتالدى. ەڭبەك جانە الەۋمەتتىك-ەكونوميكالىق قۇقىقتاردى قورعاۋداعى بەلسەندى قىزمەتى, سونداي-اق الەۋمەتتىك ارىپتەستىكتى نىعايتۋعا قوسقان ەلەۋلى ۇلەسى ءۇشىن كاسىپوداق مۇشەلەرىنە ەلوردا اكىمى التاي كولگىنوۆتىڭ اتىنان العىس حاتتار تابىس ەتىلدى.
ماراپاتتاۋ راسىمىنە ىشكى ساياسات باسقارماسىنىڭ باسشىسى داۋرەن بابامۇراتوۆ قاتىستى. باسقارما باسشىسى اكىمنىڭ اتىنان قاتىسۋشىلاردى كەلە جاتقان كاسىبي مەرەكەلەرىمەن قۇتتىقتاپ, العىس حاتتار تابىس ەتتى.
ايتا كەتەيىك, 10 قازان – كاسىپوداقتار كۇنى. اتاۋلى داتا ۇكىمەتتىڭ 2019 جىلعى 22 مامىرداعى №303 قاۋلىسىنا سايكەس اتاپ وتىلەدى. تۇڭعىش پرەزيدەنت -ەلباسى نۇرسۇلتان نازارباەۆ «قازاقستاننىڭ كاسىپوداقتارى – تۇراقتىلىقتىڭ تىرەگى, الەۋمەتتىك-ەڭبەك قاتىناستارىنىڭ بازالىق ەلەمەنتى» دەپ كاسىپوداقتار قىزمەتىن جوعارى باعالاعان بولاتىن. ەلىمىزدەگى كاسىپوداقتار فەدەراتسياسى – جۇمىس بەرۋشىلەر مەن ەڭبەككەرلەر اراسىندا باستى التىن كوپىر, قوعامداعى ءىرى جانە قۋاتتى ازاماتتىق ينستيتۋتتاردىڭ ءبىرى. ۇيىمنىڭ قىزمەتى قىزمەتكەرلەردىڭ قۇقىعى مەن مۇددەسىن قورعاۋعا, ءوندىرىس شارتتارىن جاقسارتۋعا, ەڭبەك داۋلارىن رەتتەۋگە باعىتتالعان.
اتالمىش شارادا كاسىپوداق الدىندا سىڭىرگەن ەرەكشە ەڭبەگى, جەمىستى, كوپ جىلعى ەڭبەگى جانە كاسىپوداق قوزعالىسىنىڭ قالىپتاسۋىنا, بىرلىگىن نىعايتۋعا جانە دامۋىنا قوسقان ەلەۋلى ۇلەسى ءۇشىن قازاقستان كاسىپوداقتار فەدەراتسياسىنىڭ اتىنان مەدالدار تابىس ەتىلدى.
نۇر-سۇلتان قالاسى كاسىپوداق ورتالىعىنىڭ باسشىسى تولەگەن كۇنادىلوۆ ءوز سوزىندە 105 مىڭعا جۋىق قىزمەتكەر مەن 508 باستاۋىش كاسىپوداق ۇيىمدارى ەلوردانىڭ وركەندەۋىنە ءوز ۇلەسىن قوسىپ كەلە جاتقانىن اتاپ ءوتتى.
– مەملەكەت باسشىسى قاسىم-جومارت توقاەۆتىڭ ۇكىمەتتىڭ كەڭەيتىلگەن وتىرىسىندا سويلەگەن سوزىنە سايكەس, ەڭبەك داۋلارىن شەشۋ جونىندەگى كوميسسيا قىزمەتىنىڭ تيىمدىلىگىن ارتتىرۋ ماقساتىندا قالا اكىمىنىڭ توراعالىعىمەن كوميسسيا قۇرۋ تاپسىرىلدى. وسىعان بايلانىستى بيىلعى 12 شىلدەدە نۇر-سۇلتان قالاسىنىڭ اكىمى التاي كولگىنوۆتىڭ توراعالىعىمەن جاڭا قۇرامدا كوميسسيا بەكىتىلدى. كاسىپوداق ورتالىعى ەڭبەكاقى تولەۋ ماسەلەلەرىن ودان ءارى شەشۋگە باعىتتالعان جۇمىستى جالعاستىرادى. ءبىز سونداي-اق الەۋمەتتىك سەرىكتەستەرمەن ۇجىمدىق شارت ارقىلى قىزمەتكەرلەردى قولداۋ شارالارىن جەتىلدىرۋ بويىنشا جۇمىس ىستەيمىز, – دەدى ت.كۇنادىلوۆ.
كاسىپوداق ورتالىعىنىڭ باسشىسى سونداي-اق كاسىپوداقتاردىڭ باستى ۇستانىمى قىزمەتكەرلەردىڭ ءال- اۋقاتىن ارتتىرۋ, ولاردىڭ تابىسى مەن ءومىر ءسۇرۋ دەڭگەيىن جاقسارتۋ ەكەنىن اتاپ ءوتتى.
باۋىرجان سەگىزباەۆ
