بۇگىندە ەلوردانىڭ ەڭبەك نارىعىنداعى جاي-كۇي تۇراقتى.
2013 جىلدىڭ ءبىرىنشى جارتىجىلدىعىندا قالالىق جۇمىسپەن قامتۋ ورتالىعىنا 6085 ادام حابارلاسىپتى.
دەرەكتەرگە سەنسەك, 3447 ادام (56,6%) الەۋمەتتىك قورعاۋعا الىنعان. ونىڭ ىشىندە 1131 ادام جۇمىسقا ورنالاستىرىلعان; 1408 ادام قوعامدىق جۇمىسپەن قامتىلىپ, 519 ادام كاسىپتىك دايارلاۋدان ءوتىپتى. «جۇمىسپەن قامتۋ – 2020» باعدارلاماسىنا قاتىسۋشى 256 ادام الەۋمەتتىك كەلىسىمشارتقا وتىردى.
جىل باسىنان بەرى ەكونوميكانىڭ ءتۇرلى سالاسىنان 9619 جاڭا جۇمىس ورىندارى اشىلدى. ونىڭ 6598 -ءى – شاعىن بيزنەس سەكتورىندا.
تۇراقتى وتكىزىلىپ تۇراتىن بوس ورىندار جارمەڭكەسى جۇمىسقا ورنالاستىرۋ مۇمكىندىكتەرىن كەڭەيتۋ ماقساتىندا ۇيىمداستىرىلادى. جىل باسىنان بەرى ونداي شارا ءۇش مارتە وتكىزىلدى. ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ بازاسىندا تۋريزم بويىنشا وتكىزىلگەن بوس ورىندار جارمەڭكەسىنە 700-گە تارتا وقۋ ورىندارىنىڭ ستۋدەنتتەرى مەن مەكتەپ تۇلەكتەرى قاتىسىپ, جۇمىس ىزدەۋشىلەرگە مىڭنان استام بوس جۇمىس ورىندارى ۇسىنىلعان بولاتىن. سونىمەن قاتار, جارمەڭكە اياسىندا «نۇر وتان» حدپ-مەن بىرلەسىپ, «دۇرىس تاڭداۋ جاسا» اكتسياسى ۇيىمداستىرىلدى. مەكتەپ ءبىتىرۋشى تۇلەكتەر قالاداعى جانە وقۋ ورىندارىنداعى گازدانەكەرلەۋشى, ەلەكتريك, كران ءماشينيسى, توكار, قوناق ءۇي, مەيرامحانا جانە تۋريستىك قىزمەت كورسەتۋ ماماندىعىنا وقىتىلاتىنى جونىندە ماعلۇمات الدى. كوللەدج وكىلدەرى وقۋ ورنىنىڭ ماتەريالدىق-تەحنيكالىق بازاسىن تانىستىراتىن تاعاندار مەن بۋكلەتتەر دايىندادى. تەمىرجول ۆوكزالى اۋدانىندا وتكىزىلگەن جارمەڭكە وسى توڭىرەكتەگى ءوزىن-ءوزى جۇمىسپەن قامتىعان ازاماتتاردى (پاتەردى جالعا بەرۋشىلەر, تاكسي جۇرگىزۋشىلەرى, جۇك تاسۋشىلار جانە ت.ب.) جۇمىسقا تارتۋدى ماقسات ەتتى.
عالامتوردا جۇمىسسىزدىق دەڭگەيىن تومەندەتۋ ماقساتىندا قۇرىلعان www.job.astana.kz پورتالى جۇمىس ىستەيدى. ەندى جۇمىس ىزدەستىرۋشىلەر ءوز تۇيىندەمەلەرىن جولداي وتىرىپ, بوس جۇمىس ورىندارىمەن تانىسا الادى, ال جۇمىس بەرۋشىلەر ءوز كەزەگىندە, قاجەتتى مامانداردى تابۋ مۇمكىندىگىنە يە بولدى.
سونىمەن قاتار, بيىل ناۋرىز ايىنان «ەلوردانىڭ ەڭبەك نارىعى» («ستوليچنايا بيرجا ترۋدا») گازەتى جارىق كورە باستادى. گازەت ايىنا ءبىر رەت, قازاق جانە ورىس تىلدەرىندە 8 بەت بولىپ باسىلادى. نەگىزگى ماقساتى – جۇمىسسىزداردىڭ, ونىڭ ىشىندە جاستاردىڭ اراسىندا قۇقىقتىق ساۋاتتىلىقتى ارتتىرۋ, جۇمىسپەن قامتۋ, ماماندىق الۋ, ۋاقىتشا جۇمىسپەن قامتاماسىز ەتۋ جونىندە تولىققاندى اقپاراتپەن قامتاماسىز ەتۋ.
جۇمىسپەن قامتۋ سالاسىنداعى اتقارىلعان جۇمىستاردىڭ كورسەتكىشتەرى وسىنداي.
جۇمىسسىزدىق دەڭگەيى
2012 جىلى – 5,7%,
2013 جىلدىڭ 1 توقسانىندا – 5,6%
2013 جىلدىڭ 1 توقسانىندا ەلوردانىڭ ەكونوميكالىق تۇرعىدان بەلسەندى حالىق سانى 433,9 مىڭ ادامدى, جۇمىسپەن قامتىلعان حالىق سانى 409,7 مىڭ ادامدى, جۇمىسسىزدار سانى 24,2 مىڭ ادامدى قۇرادى.
ايگۇل ۋايسوۆا
