ۇلتتىق اكادەميالىق كىتاپحانادا «بالالار ادەبيەتى جىلىنا» وراي وتكىزىلگەن «ەر توستىك» بالالار مەن جاسوسپىرىمدەر شىعارمالارى ادەبي بايقاۋىنىڭ جەڭىمپازدارى ماراپاتتالدى.
«بالالار ادەبيەتى جىلىنا» ورايلاستىرىلعان شارا مەكتەپ وقۋشىلارى مەن جاسوسپىرىمدەردىڭ شىعارماشىلىعىنا ارنالدى. ەكى اي ىشىندە 90 اۆتوردان 100- گە جۋىق جۇمىس قابىلداندى. جاس قالامگەرلەر پروزا, ەرتەگى, ولەڭ جانە ۇزدىك يلليۋستراتسيا اتالىمدارى بويىنشا ىرىكتەلدى. ماراپاتتاۋ راسىمىنە جازۋشىلار, دەپۋتاتتار جانە ۇستازدار قاۋىمى قاتىستى.
«شابىلماعان جۇيرىكتى, شاعىلماعان بالا شاپسىن» دەگەن. سول ايتقانداي, «ەر توستىك» ادەبي بايقاۋىندا ءىزى بىتپەيتىن, تۇياعى كەتپەيتىن تۇلپاردى يەلەنگەن جۇيرىكتەرىمىز ءاردايىم شابا بەرسىن. بارلىق جەڭىمپازداردى قۇتتىقتايمىن. بولاشاقتا شىعارماشىلىقتارىنا تابىس پەن ساتتىلىك تىلەيمىن. ادەبي بايقاۋدىڭ ماقساتى – بالالار مەن جاسوسپىرىمدەرگە ارناپ جازاتىن تالانتتى قالامگەرلەردى انىقتاۋ, لايىقتى ماراپاتتاۋ, قازاق بالالار ادەبيەتىن قولداۋ جانە دامىتۋ, – دەدى اقىن, جازۋشىلار وداعىنىڭ توراعاسى ۇلىقبەك ەسداۋلەت.
ماراپاتتاۋ ءراسىمى بىرنەشە نوميناتسيالار بويىنشا ءوتتى «پروزا» جانرى بويىنشا 1-ورىندى نۇربەك نۇرجان – «كىتاپ پاتشالىعى» شىعارماسى ءۇشىن, «ەرتەگى» نوميناتسياسى بويىنشا 1-ورىندى بالنۇر قىزىربەكقىزى – «جوعالعان سيقىرلى تاياقشا تۋرالى ەرتەگى» شىعارماسى ءۇشىن, «بالالارعا ارنالعان ولەڭدەر» اتالىمى بويىنشا 1-ورىندى ءشامشيا جۇباتوۆا – «ولەڭدەر» توپتاماسى ءۇشىن, «ۇزدىك يلليۋستراتسيا» اتالىمى بويىنشا 1-ورىندى جەڭىس كاكەن ەنشىلەدى. سونداي-اق قاتىسۋشىلارعا ارنايى نوميناتسيالار مەن جۇلدەلەر ۇسىنىلدى.
