نۇر-سۇلتان قالاسىندا ۆولونتەرلەر ۇلتتىق حالىق ساناعى جۇمىسىنا بەلسەندى ارالاسىپ ءجۇر. 1 قازاننان باستاپ ۇلتتىق حالىق ساناعى اياسىندا ينتەرۆيۋەرلەردىڭ ۇيلەردى جاپپاي ارالاۋى ءجۇرىپ جاتىر. بۇل – ەلىمىز تاۋەلسىزدىك العان ساتتەن بەرى ءوتىپ جاتقان ءۇشىنشى حالىق ساناعى. بيىل حالىق ساناعىنا العاش رەت تسيفرلىق تەحنولوگيالار قولدانىلۋدا.
ەرىكتىلەردىڭ بۇل جۇمىسى حالىق ساناعى پروتسەسىنىڭ جىلدامداۋىنا سەپتىگى تيەرى ءسوزسىز. «ۆولونتەرلەر حالىق ساناعى بويىنشا اقپاراتتىق بۋكلەتتەر تاراتىپ ءجۇر. وسىلايشا قالا تۇرعىندارىنا حالىق ساناعى بويىنشا تىركەۋگە تۇرۋ, كىرۋ جونىندە اقپاراتتىق كومەك كورسەتىپ جاتىرمىز. تۇرعىن ۇيلەردەگى پوشتا جاشىكتەرىنە دە وسىنداي اقپاراتتىق بۋكلەتتەر سالامىز. حالىق ساناعىنا شامامەن 50-گە تارتا ەرىكتى ارالاسىپ ءجۇر» دەدى «استانا جاستارى» كمم مامانى دامير ايتىموۆ.
ءداستۇرلى جاپپاي ءۇي-ءۇيدى ارالاۋ كەزەڭىندە بۇرىن ونلاين-ساناقتان وتكەن رەسپوندەنتتەر ەكىنشى رەت قايتا جازىلمايدى. ولار ينتەرۆيۋەرگە ساناق وتكەندىگى تۋرالى بۇرىن الىنعان SMS-حابارلامانى نەمەسە ەلەكتروندىق حابارلامانى كورسەتۋى ءتيىس.
– ۆولونتەر بولعانىما ءبىر اي بولدى. ءوز ومىرىمە وزگەرىس ەنگىزىپ, اينالاما كومەكتەسۋ ءۇشىن ەرىكتىلەر توبىنا قوسىلعانمىن. قازىر حالىق ساناعى بويىنشا قالا تۇرعىندارىنا بۋكلەتتەر تاراتىپ ءجۇرمىز. سول سياقتى تۇرعىن ءۇي كەشەندەرىن ارالايمىز, – دەدى «استانا جاستارى» كمم ۆولونتەرى اسىلايىم جولتاي.
