باتىستا جۇمىسقا تۇراردا دا, ۋنيۆەرسيتەتكە تۇسەردە دە باعادان گورى ۆولونتەرلىك قىزمەت كوبىرەك باعالانادى. بىزدە دە وسىنداي قۇندىلىقتى دارىپتەيتىن ورتا قۇرۋ قاجەت. بۇل تۋرالى نۇر-سۇلتان قالاسىنىڭ اكىمى التاي كولگىنوۆ جەرگىلىكتى ۇكىمەتتىك ەمەس ۇيىم وكىلدەرىمەن كەزدەسۋىندە مالىمدەدى.
«ۇلتتىق ۆولونتەرلىك جەلى» ۇيىمىنىڭ اتقارۋشى ديرەكتورى تاتيانا ميرونيۋكتىڭ ايتۋىنشا, قازىرگى ۋاقىتتا اتالعان ۇيىمعا 8 مىڭداي ستۋدەنت تىركەلگەن ەكەن.
جيىنعا كەلگەن ۇەۇ قاتارىندا وتباسىلىق زورلىق-زومبىلىققا تاپ بولعانداردى قۇتقاراتىن ۇيىمدار دا بولدى. ماسەلەن, اننا رىل مەن ونىڭ «قورعاۋ استانا» قورى ون بەس جىلدان استام ۋاقىت بويى وسىنداي قيىندىققا ۇشىراعان ايەلدەر مەن بالالارعا, قۇجاتى جوق ازاماتتارعا, ادام ساۋداسىنىڭ قۇرباندارىنا, سونداي-اق ميگرانتتارعا جاردەمدەسىپ كەلەدى.
– جىل سايىن ءبىزدىڭ كومەگىمىزگە جۇگىنەتىندەر سانى وسۋدە. بيىلدىڭ وزىندە 700-گە جۋىق استانالىق تۇرعىنعا كەڭەس بەرىپ, ءتيىستى تۇرعىدا قول ۇشىن بەردىك. ولاردىڭ اراسىندا كوبىسى – وتباسى مۇشەلەرىنەن ءجابىر كورگەن ايەلدەر. مۇنىمەن قوسا, ءبىزدىڭ مەكەمە تىركەۋگە تۇرعىزىپ, قۇجاتتاردى قالپىنا كەلتىرۋگە دە كومەكتەسەدى, – دەدى ول.
اننانىڭ ايتۋىنشا, قازىرگى تاڭدا ۇيىم ورنالاسقان عيمارات تار بولعاندىقتان, كوپ ادامدى قابىلداۋعا مۇمكىندىك جوق. ءوز كەزەگىندە قالا باسشىسى بۇل ماسەلەنى شەشۋگە اتسالىساتىنىن جەتكىزدى.
بۇدان بولەك, قالا باسشىسى الەۋمەتتىك كاسىپكەرلىكتىڭ جارقىن ۇلگىسىن تانىتىپ جۇرگەن ەلوردالىق ازامات, «Green Tal» شەبەرحاناسىنىڭ نەگىزىن سالۋشى ەمين اسكەروۆ, «تاۋەلسىز ءومىر» دوس» قوعامدىق بىرلەستىگىنىڭ ۇيلەستىرۋشىسى ارداق وتارباەۆ, «جاس كاسىپكەرلەر كەڭەسى» قوعامدىق ۇيىمىنىڭ ءتورايىمى اينۇر ءامىرحان سەكىلدى بىرقاتار ۇەق وكىلدەرىنىڭ باياندامالارىن تىڭداپ, ولاردىڭ جۇمىستارىنا وڭ باعا بەردى.
– بيىل قالاداعى بەلسەندى ۇەۇ سانى وتكەن جىلمەن سالىستىرعاندا 2 ەسەگە, ياعني 273-تەن 471-گە دەيىن ارتتى. قوعام ءۇشىن پايدالى جوبالاردى ىلگەرىلەتەتىن ۇەۇ بار ەكەنى قۋانتادى, – دەدى ەلوردا باسشىسى.
