استاناداعى ورتالىقتاندىرىلعان كىتاپحانالار جۇيەسىنە قاراستى №3 كوپشىلىك كىتاپحاناسىندا جەڭىس كۇنىنە ارنالعان «ۇلى جەڭىس جولىندا» دەپ اتالعان ەرلىك ساباعى ءوتتى. وعان اۋعان سوعىسىنىڭ ارداگەرى قايرات ەلۋباەۆ پەن №5573 اسكەري ءبولىمىنىڭ قىزمەتكەرلەرى نۇكەش سارتاباي مەن ەرجان ماراتوۆ قاتىستى.
شارا بارىسىندا اعا كىتاپحاناشى زاپۋرا دايراباەۆا ەكىنشى دۇنيەجۇزىلىك سوعىستا وشپەس داڭقتىڭ ۇلگىسىن كورسەتكەن قازاقتىڭ قاھارمان ۇل-قىزدارى تۋرالى ءسوز قوزعادى. اسىرەسە, بيىل تۋعانىنا 95 جىل تولىپ وتىرعان ەكى مارتە كەڭەس وداعىنىڭ باتىرى, ايگىلى ۇشقىش تالعات بيگەلدينوۆ پەن كەڭەس وداعىنىڭ باتىرى, پۋلەمەتشى مانشۇك مامەتوۆانىڭ سۇم سوعىستاعى ەرلىك جولدارى كوبىرەك ايتىلدى. №40 الكەي مارعۇلان اتىنداعى ورتا مەكتەبىنىڭ 8-ءشى سىنىپ وقۋشىلارى مايدان دالاسىنان شاعىن كورىنىس قويدى. جەتكىنشەكتەر ازىرلەگەن قويىلىم كوز الدىمىزعا قاندى قىرعىندى ەلەستەتتى. قاسىق قانى قالعانشا جاۋمەن شايقاسقان باتىر بابالارى تۋرالى اقىنداردىڭ جازعان جىرلارىن وقىدى. سەرىكبول اياجان اقىن ءابۋ سارسەنباەۆتىڭ «سەن قۇرمەتتە ونى!» اتتى ولەڭىن شىنايى جەتكىزدى. «ناز» مەملەكەتتىك تەاترىنىڭ انشىلەرى مايدان اندەرىن شىرقادى.
ودان كەيىن ينتەرناتسيوناليست-جاۋىنگەر قايرات ەلۋباەۆ سۇراپىل سوعىس كەزىندەگى اتالارىمىزدىڭ ەرجۇرەك قاسيەتىن ايتىپ, سولاردىڭ باتىرلىعى اۋعان سوعىسىندا ۇلگى بولعاندىعىن جەتكىزدى. №5573 اسكەري ءبولىمىنىڭ اسكەري قىزمەتكەرلەرى نۇكەش سارتاباي مەن ەرجان ماراتوۆ وقۋشىلارعا وتان تۋرالى ۇلاعاتتى وي شەرتىپ, روتاداعى ساربازداردىڭ ءوز ومىرلەرىن قاتەرگە تىگىپ, ورتتەن 8 ادامدى الىپ شىققان ەرلىكتەرىن باياندادى. ءبىر سوزبەن ايتقاندا, ەرلىك ساباعى وقۋشىلارعا تاعىلىمدىق وي سالار ماعىنادا ءوتتى.
ازامات ەسەنجول
