ماتەماتيكانىڭ عىلىمدا عانا ەمەس, ادام ومىرىندە الاتىن ورنى ەرەكشە. ونى تەك قانا ەسەپتەۋ دەپ ويلاپ, قوسۋ مەن الۋدى بىلسەك جەتكىلىكتى, قالعانىن عالىمداردىڭ شارۋاسى دەپ قاراۋ شولاق ويلاۋ ىسپەتتى.
شىندىعىندا, شاڭىراعىمىزدان باستاپ ءمىنىپ جۇرگەن كولىك, ەلەكتر شاينەگى مەن قولىمىزداعى سەنىمدى سەرىگىمىزگە اينالعان تەلەفوننىڭ بارلىق ارەكەتى ماتەماتيكالىق دالدىك پەن ەسەپتەۋلەردىڭ ناتيجەسى ەكەنىن ايتساق تا جەتكىلىكتى. سوندىقتان ماتەماتيكا ءپانىن تەرەڭدەتىپ وقىتۋدىڭ پايداسى زور. وسى ماقساتتا استانا قالاسى اكىمدىگىنىڭ ادىستەمەلىك ورتالىعى مەن «زەردەلى» اقىل-وي دامىتۋ ورتالىعى باستاۋىش سىنىپ جانە ماتەماتيكا ءپانى مۇعالىمدەرىنە ارنالعان «ماتەماتيكالىق كلۋب» جوباسىن باستادى. كلۋب مۇعالىمدەردىڭ شىعارماشىلىق الەۋەتى مەن پەداگوگيكالىق شەبەرلىگىن دامىتىپ, وليمپيادا رەزەرۆىن قالىپتاستىرۋدا مۇعالىمدەرگە كومەك كورسەتەدى, وقىتۋشىلاردىڭ كاسىبي داعدىسىن جەتىلدىرىپ, ءوزارا تاجىريبە الماسۋىنا ىقپال ەتۋدى كوزدەيدى.
ماتەماتيكالىق كلۋب وفلاين تۇردە مەملەكەتتىك تىلدە جۇمىس ىستەيدى. كلۋبقا مۇشەلىككە كىرۋ تەگىن. ءار مەكتەپ ءوز ىشىنەن كلۋبقا مۇشەلىككە 2 مۇعالىمدى (باستاۋىش سىنىپ مۇعالىمىنەن بىرەۋ, ماتەماتيكا ءپانى مۇعالىمىنەن بىرەۋ) ىرىكتەيدى. ىرىكتەۋ سىنىنداعى تالاپتاردىڭ شەكتى ۇپايىنان اسقان مۇعالىم «ماتەماتيكالىق كلۋب» مۇشەسىنە قابىلدانادى.
ءار مۇعالىمگە ادىستەمەلىك ورتالىق پەن «زەردەلى» اقىل-وي دامىتۋ ورتالىعىنىڭ اتىنان «ماتەماتيكالىق كلۋب» مۇشەسى دەگەن كۋالىك بەرىلدى. بەلگىلى سىناقتان وتكەننەن كەيىن ماتەماتيكا ءپانى بويىنشا 41 پەداگوگ, باستاۋىش سىنىپ بويىنشا 60 پەداگوگ كلۋب مۇشەلىگىنە قابىلداندى.
كلۋب جۇمىسى 2023-2024 وقۋ جىلىنا ارنالىپ, «زەردەلى» اقىل-وي دامىتۋ مەكتەبىنىڭ ارنايى باعدارلاماسى نەگىزىندە جۇرگىزىلەدى.
جوبانىڭ تيىمدىلىگى سوندا, ەسەپتەردىڭ شەشىمىن تابا وتىرىپ, بالانىڭ ويلاۋ جۇيەسىنىڭ دامۋىنا ىقپال ەتىپ, ءومىردىڭ كەز كەلگەن جاعدايىندا دۇرىس ارەكەت ەتۋگە تاربيەلەيدى.
ەرعازى ماناپۇلى
