سۋ بەتىنە مۇز قاتا سالىسىمەن ءبىرىنشى بولىپ كونكي مەن شانا تەبۋگە اسىققان بالالار مەن جاسوسپىرىمدەر وزەنگە جۇگىرەدى. جۇقا مۇزدىڭ ۇستىمەن ءجۇرۋدىڭ اسا قاۋىپتى ەكەندىگىن قۇتقارۋشىلار جاقسى بىلەدى. قايعىلى وقيعالاردىڭ الدىن الۋ ءۇشىن ەلوردالىق تج قىزمەتى تاۋلىك بويعى رەجيمدە جۇمىس ىستەيدى. مۇنارادان باقىلاۋ جۇرگىزىلىپ, جاعالاۋ سىزىعى شولىنادى, قالاداعى سۋ توعاندارىنداعى مۇز قاباتىنا مونيتورينگ جۇرگىزىلەدى. قازىر ارنايى جاساققا 76 قۇتقارۋشى تارتىلعان, ۇيرەتىلگەن يتتەر دە كومەككە كەلۋگە دايىن.
«سوڭعى ءۇش جىلدا مۇز قاتۋعا قاتىستى قايعىلى وقيعالار تىركەلگەن جوق. ءبىز اۋقىمدى ۇگىت-ناسيحات جۇمىستارىن جۇرگىزىپ وتىرامىز. ۇيىمدار مەن كاسىپورىندارعا, وقۋ مەكەمەلەرىنە ءۇش مىڭعا جۋىق ماتەريال تاراتتىق. كۇن سايىن بىرنەشە ادامعا – بالىقشىلارعا, بالالارعا ەسكەرتەمىز. كونكي تەۋىپ جۇرگەن ۇلداردى كورۋگە بولادى. ولار ءبىزدى كورە سالا قاشىپ كەتەدى دە, كەيىن وزەنگە قايتىپ كەلەدى. بيىل وزەنگە مۇز قاتۋ مەكتەپ دەمالىسىمەن سايكەس كەلدى, سول سەبەپتى اتا-انالاردان بالالارىنا قارايلاپ, ولاردى وزەنگە جىبەرمەۋدى سۇرايمىز», – دەپ ءمالىم ەتتى استانا ق. ورتالىق وڭىرلىك اەروۇتقىر جەدەل-قۇتقارۋ جاساعى باسشىسىنىڭ ورىنباسارى بەيسەنباي جەكسەنوۆ.
سونداي-اق, ول مۇز استىنا قۇلاعان كەزدە ەرەجە ساقتاۋدىڭ ماڭىزدىلىعىن اتاپ كورسەتتى. ونىڭ ايتۋىنشا, ەڭ باستىسى ۇرەيلەنبەي, كومەككە شاقىرۋ كەرەك. جۇكتى, جولدوربانى ءبىر يىققا اسۋ كەرەك, ال ەڭ جاقسىسى ونى مۇزدىڭ ۇستىنە سالىپ, سۇيرەتۋ. شۇعىل قيمىلداماعان دۇرىس. مۇز ۇستىنە ەكى قولدىڭ اراسىن كەڭ اشىپ, قۇلاعان جاققا قاراي شىعۋ كەرەك.
سينوپتيكتەردىڭ بولجامىنا سايكەس, جىلى اۋا رايى قاراشانىڭ ءۇشىنشى ونكۇندىگىنە دەيىن ساقتالادى. سودان كەيىن اۋا تەمپەراتۋراسى تومەندەۋى مۇمكىن.
astana.gov.kz
