استانا اكىمدىگى قاماۋدان بوساعانداردى ەلوردا اۋماعىنان تىس شىعارۋ تۋرالى ماسەلەنى ءتۇسىندىردى

ەسكە سالساق, ۇستىمىزدەگى جىلدىڭ 27 قازانىندا قازاقستان رەسپۋبليكاسىنىڭ زاڭدىلىقتى, قۇقىقتىق ءتارتىپتى جانە قىلمىسقا قارسى كۇرەستى قامتاماسىز ەتۋ جونىندەگى ۇيلەستىرۋ كەڭەسىنىڭ كەڭەيتىلگەن وتىرىسى ءوتتى, ونىڭ شەڭبەرىندە اندرەي لۋكين جوعارىدا اتالعان ۇسىنىستى جاريالاعان. الايدا بىرقاتار باق اقپاراتتى بۇرىس بەرىپ, اتالعان تىيىم باس بوستاندىعىنان ايىرۋ ورىندارىنان بوساپ شىققان بارلىق تۇلعالارعا قاتىستى قولدانىلادى دەپ حابار تاراتتى.

«ەكى مەكەمەدە 1 قاڭتاردان باستاپ 380-گە جۋىق ادامدى بوستاندىققا شىعارۋعا دايىندىق جۇرگىزىلىپ جاتىر, بۇل – كىسى ءولتىرۋ, زورلاۋ, قاراقشىلىق شابۋىل جانە ەسىرتكى زاتتارىن زاڭسىز جاساۋ سياقتى وتە اۋىر قىلمىستار ءۇشىن سوتتالعان ادامدار. بارلىعى – رەتسەديۆيستەر. ستاتيستيكا كورسەتىپ وتىرعانداي, كوبىنەسە قىلمىستار قايتا جاسالادى. بۇل ورايدا مەن زاڭنامالىق نورمالاردى ازىرلەۋدە شارالاردى قاتاڭداتۋدى ۇسىندىم. بۇل ماسەلەلەر بويىنشا ساراپشى كوميسسيا شەشىم قابىلدايدى», – دەپ اتاپ كورسەتتى استانا ق. اكىمىنىڭ ورىنباسارى اندرەي لۋكين.

سونداي-اق, اتالعان ساناتتاعى ادامداردىڭ قوعامعا تەز بەيىمدەلىپ, ارالاسۋى ءۇشىن ولارعا پسيحولوگيالىق كومەك كورسەتۋ جانە جۇمىسقا تارتۋ تۇرىندە الەۋمەتتەندىرۋ شارالارى قولدانىلاتىن بولادى. بۇل ماقساتتا ەلىمىزدىڭ بارلىق ايماقتارىندا قىلمىستىق-اتقارۋ جۇيەسى دەپارتامەنتتەرىنىڭ جانىنان پروباتسيا قىزمەتتەرى جۇمىس ىستەيدى. تۇراقتى مەكەن-جايى جوق جانە كوممەرتسيالىق جىنىستىق قاتىناس جۇمىسكەرلەرىنە قاتىستى دا وسىنداي شارالار قولدانىلادى. بۇل باعىتتا اكىمدىك, قوعامدىق قاۋىپسىزدىك بولىمدەرى جانە ەرىكتىلەر جوسپارلى جۇمىس جۇرگىزۋدە, دەدى اندرەي لۋكين.

astana.gov.kz