م.گوركي اتىنداعى مەملەكەتتىك اكادەميالىق ورىس دراما تەاترىنىڭ كۇردەلى جوندەۋى كەلەسى جىلدىڭ سوڭىنا قاراي اياقتالادى. ەلوردا اكىمى التاي كولگىنوۆ تەاتر عيماراتىنا بارىپ, جوندەۋ جۇمىستارىمەن تانىستى.
م.گوركي اتىنداعى مەملەكەتتىك اكادەميالىق ورىس دراما تەاترىنىڭ ساحناسىندا مىڭداعان قويىلىمدار قويىلدى, وندا تەاتر اكتەرلەرىنىڭ بىرنەشە ۇرپاعى شىڭدالىپ شىقتى. بۇل تەاتر – ەلىمىزدەگى ەڭ كونە مادەني مەكەمەلەردىڭ ءبىرى. 1899 جىلدان بەرى حالىق رۋحانياتىنا قىزمەت ەتىپ كەلەدى.
«بۇل, شىنىمەن دە, وزىندىك تاريحى بار ەرەكشە ورىن. بىراق, ارينە, تەاتر ەسكىرىپ, كۇردەلى جوندەۋدى قاجەت ەتتى. جوندەۋ جۇمىستارى 2018 جىلى باستالعانىنا قاراماستان ءالى اياقتالعان جوق. سىبايلاس جەمقورلىققا جول بەرىلدى, ونىڭ ىشىندە مەردىگەر تاراپىنان زاڭ بۇزۋشىلىقتار بولدى. ولاردىڭ سالعىرتتىعىنان تەاتر قىزمەتكەرلەرىنىڭ وزدەرى, كورەرمەندەر زارداپ شەكتى. قازىرگى ۋاقىتتا سوت راسىمدەرى تولىعىمەن اياقتالدى. جاڭا مەردىگەر انىقتالدى, وعان وزگەلەردىڭ قاتەلىگىن قايتالاماۋ تاپسىرىلدى» دەدى التاي كولگىنوۆ.
وسىلايشا تاريحي عيماراتتى كۇردەلى جوندەۋ كەلەسى جىلدىڭ سوڭىنا قاراي اياقتالادى دەپ جوسپارلانىپ وتىر. زالداردى جاڭارتۋدان, عيماراتتى جوندەۋدەن باسقا ينجەنەرلىك جەلىلەر جاڭارتىلىپ, رەتكە كەلتىرىلەدى: سۋ قۇبىرى, كارىز, سونداي-اق جەلدەتۋ جۇيەسى, جىلىتۋ جانە ت. ب.
«قازىرگى ۋاقىتتا تەاتر ۇجىمى وزگە تەاترلاردىڭ الاڭدارىندا جانە دراما تەاتردىڭ كىشى زالىندا ونەر كورسەتەدى. بۇل, ارينە, تەاتر ۇجىمىنا بەلگىلى ءبىر قولايسىزدىقتار تۋدىرۋدا. كۇردەلى جوندەۋ اياقتالعاننان كەيىن تاريحي عيمارات جاڭارىپ, كورەرمەندەرگە ۇمىتىلماس اسەر سىيلايتىنىنا سەنەمىز. سونداي-اق «ناز» مەملەكەتتىك بي تەاترى جانە «قۋىرشاق تەاترى» ۇجىمدارىنا دا قولايلى ورىن ءبولۋدى تاپسىردىم, ويتكەنى قازىر ولار قولايسىز عيماراتتاردا دايىندالىپ ءجۇر» دەدى قالا اكىمى.
