كوپەس بايمۇحامبەت قوسشىعۇلوۆ تۋرالى بىرەۋ بىلسە, ەندى بىرەۋلەر بىلە بەرمەيدى. ب.قوسشىعۇلوۆ – اقمپولا قالاسىنىڭ ساياسي-ەكونوميكالىق دامۋىنا ۇلەس قوسقان اقمولانىڭ العاشقى كاسىپكەرلەرىنىڭ ءبىرى.
ب.قوسشىعۇلوۆ – كاسىپكەر عانا ەمەس, قالا ساۋلەتىنە, ونەركاسىپتىڭ دامۋىنا, جاس ۇرپاقتىڭ ءبىلىم الۋىنا ۇلەس قوسقان تۇلعا. ول اقمولا قالاسىنا بىرنەشە ءۇي, فابريكا, مەشىت جانە مەدرەسە سالعان. ونىڭ كونديتەرلىك فابريكاسى ەلورداداعى قازىرگى «تۋريست» قوناق ءۇيى مەن «قىزمەت كورسەتۋ ءۇيىنىڭ» اراسىنداعى جەردە ورنالاسقان. سونىمەن قاتار, قازىرگى تاڭدا «حالىق بانكىنىڭ» بولىمشەسى ورنالاسقان اباي داڭعىلى مەن ءا.مامبەتوۆ كوشەسىنىڭ قيىلىسىنداعى عيمارات بۇرىن قوسشىعۇلوۆتار سالعان مۇسىلمان مەكتەبى بولعان. كوپەستىڭ ساۋدا-ساتتىق جۇمىستارىنان بولەك, حالىققا كورسەتكەن كومەگى, جومارتتىعى – ءبىر بولەك اڭگىمە.
ەلوردانىڭ نەگىزى سانالاتىن اقمولا تاريحىندا ايرىقشا ءىز قالدىرعان بايمۇحامبەت قوسشىعۇلوۆتىڭ ەسىمىن ارداقتاپ, ۇمىتپاۋ – بۇگىنگى ۇرپاققا مىندەت. ب.قوسشىعۇلوۆتىڭ شوبەرەسى ليۋدميلا سۋرحاي كوپەستىڭ ەسىمىنە ەلوردادان كوشە بەرۋ ماسەلەسىن كوتەردى. قالا اكىمى ا.كولگىنوۆتىڭ تاپسىرماسى بويىنشا ءتيىستى سالالىق ورگاندارمەن بىرنەشە رەت كەزدەسىپ, كوشە بەرۋ, مەموريالدى تاقتايشاداعى قاتەنى جوندەۋ سياقتى ماسەلەلەر تالقىلاندى.
سونىمەن قاتار, كەزدەسۋلەردە اقمولانىڭ تاريحىن زەرتتەۋشىلەر نۇر-سۇلتان قالاسىنىڭ بىرىككەن مۇراجايلار ديرەكتسياسىنىڭ ديرەكتورى مەيرامباي ورالوۆ, تاريح عىلىمدارىنىڭ دوكتورى, پروفەسسور ل.ن.گۋميلەۆ اتىنداعى ەۇۋ تۇركىتانۋ جانە التايتانۋ» ينستيتۋتىنىڭ باس عىلىمي قىزمەتكەرى مارات ابسەمەتوۆ سىندى مامانداردىڭ قاتىسۋىمەن دايەكتى دەرەككوزدەرىمەن تانىستىق. سارىارقا اۋدانى ەلوردانىڭ تاريحي بولىگى بولعاندىقتان, مۇنداعى تاريحي عيماراتتاردى ساقتاپ قالۋ, ونىڭ قۇندىلىعىن كەلەشەك ۇرپاققا جەتكىزۋ ماسەلەلەرى دە قوزعالدى.
قالالىق ونوماستيكالىق كوميسسياسى كوشە بەرۋ ماسەلەسىن قاراستىرىپ, وڭ ناتيجەسىن شىعاردى. الداعى ۋاقىتتا رەسپۋبليكالىق ونوماستيكالىق كوميسسيانىڭ قاراۋىنان كەيىن ناقتى اقپاراتتار جاريالاناتىن بولادى.
تاريحي تۇلعالاردى ۇلىقتاۋ جولىنداعى جۇمىستار بۇدان ءارى دە جالعاسا بەرمەك.
