ەلىمىزدەگى ءاربىر عيماراتتان قازاقىلىقتى كورگىم كەلەدى. بۇگىندە ۇلتتىق ويۋ-ورنەكتەرمەن ەسىكتەردى نەمەسە جيھازداردى بەزەندىرۋ سانگە اينالۋدا.
بۇل – ۇلكەن سەرپىلىس. قازاق ەلىنىڭ ءوز كونە تاريحى, مادەنيەتى, وزىندىك ءداستۇرى مەن ونەرى بار. ەسكىنى جاڭا زامانعا لايىقتاپ جاساپ, مەملەكەتتىڭ, قازاق ەلىنىڭ برەندىن قالىپتاستىرۋمىز كەرەك. عيماراتتارعا كونەدەن قالعان ەلەمەنتتەردى ەنگىزسەك, ول ءبىزدىڭ تاريحىمىزدان سىر شەرتىپ, كىم ەكەندىگىمىزدى, قايدان شىققاندىعىمىزدى بايانداپ تۇرار ەدى.
بىزدە كوپشىلىك ۇلتتىق ناقىشتا جاسالعان جيھازدار قىمباتقا تۇسەدى دەپ قورقادى. شىنتۋايتىنا كەلگەندە, قالتا كوتەرەرلىك. قىمباتىن دا ارزانىن دا تابۋعا بولادى. ماسەلەن, تۇتىنۋشىلارىمىزدىڭ اراسىندا قالتالىلارمەن قاتار ورتاشا جالاقىعا يە ازاماتتار دا بار. ۇلتتىق قۇندىلىقتارىمىزدى, ويۋ-ورنەگىمىزدى ناسيحاتتاۋدى ءوز ۇيىمىزدەن باستاۋىمىز قاجەت. سوندىقتان دا مەن زاماناۋي عيمارات ديزاينىنا ۇيلەسىمدى بولاتىن ۇلتتىق ناقىشتاعى ەلەمەنتتەردى ارنايى تاڭداپ, زاماناۋي ستيلمەن ۇلتتىق بوياۋدى ۇيلەستىرۋدى ماقسات ەتتىم.
مانسۋرا جاكەن,
ديزاينەر
