استانا ەكسپو-2017 مامانداندىرىلعان كورمەنىڭ اياسىندا, قىتايدىڭ وڭتۇستىك پروۆينتسياسى حايناننان كەلگەن رەسمي دەلەگاتسيا باق وكىلدەرىمەن كەزدەستى.
ءباسپاسوز كونفەرەنتسياسى بارىسىندا اۋىلشارۋاشىلىعى باسقارماسىنىڭ باس ينجەنەرى حۋان چجەنەن قىتاي مەن قازاقستان ءۇشىن تارتىمدى دەپ تاپقان بىرنەشە باعىتتى اتاپ ءوتتى. «ءبىز سىزدەردىڭ ەلىڭىزدىڭ اۋىلشارۋاشىلىق ونىمدەرىن قۇپتايمىز, ەگەر وتاندىق تاۋارلارىڭىز قىتايعا يمپورتتالسا, تەك قۋانىشتى بولامىز. ءبىز ءوز كەزەگىمىزدە قازاقستانعا تروپيكالىق جەمىستەردى جەتكىزىپ, اۋىل شارۋاشىلىق ونىمدەرىن قايتا وڭدەۋدە بىرلەسە جۇمىس جاسار ەدىك» دەدى حۋان چجەنەن.
حالىقارالىق ساۋدانى دامىتۋعا ىقپالداسۋ بويىنشا قىتاي كوميتەتىنىڭ حايناندىق ءبولىمىنىڭ توراعاسى لي چجيتسزە, 2017 جىلدان بەرى قىتاي پروۆينتسيادا تۋريزم نىساندارىن كوپتەپ سالىپ, شەتەلدىك ينۆەستورلاردى تارتىپ جاتقانىن ايتتى. حاينان پروۆينتسياسى تۋريزم باسقارماسىنىڭ ىشكى نارىق جانە كورمەلەر بويىنشا ءبولىم باستىعىنىڭ ورىنباسارى سين چجەننىڭ ايتۋىنشا, قىتايدىڭ تروپيكالىق ارالىندا 20 مىڭنان استام قازاقستاندىقتار دەمالماق. بۇگىندە اپتاسىنا ءبىر رەتتەن الماتى-سانيا-الماتى, استانا-سانيا-استانا اۆيارەيسى قاتىنايدى. پروۆينتسيا وتىزعا تارتا شەت مەملەكەتىمەن ۆيزاسىز رەجيم ورناتقان. سونىڭ ىشىندە ورتالىق ازيا ەلدەرىنىڭ اراسىندا قازاقستاندىقتار دا حاينانعا ۆيزاسىز ساپار شەگە الادى.
ايگۇل
ۋايسوۆا
