دارىگەردىڭ ءبارى بىردەي ەمحانا مەن اۋرۋحانادا عانا جۇمىس ىستەمەيتىنى بەلگىلى. العان ءبىلىمى مەن جيناعان تاجىريبەسىن ارنايى قىزمەت كورسەتەتىن, اپاتتى جاعدايعا دۋشار بولعاندا مەديتسينالىق كومەكتى قاجەت ەتەتىن سالالاردا دا پايدالانىپ جۇرگەن اق حالاتتىلار بار. سولاردىڭ ءبىرى – 9 جىلدان بەرى استانا توتەنشە جاعدايلار دەپارتامەنتىنە قاراستى №5 مامانداندىرىلعان ءورت ءسوندىرۋ ءبولىمىنىڭ دارىگەرى بولىپ ەڭبەك ەتەتىن گۇلجان امىرەەۆا.
ءوزى 42 جاستا, ەكى بالانىڭ اناسى, ءبىر اۋلەتتىڭ ۇيىتقىسى گۇلجان مەلىسقىزىنىڭ جالپى مەديتسينالىق جۇمىس تاجىريبەسى 21 جىلدى قۇرايدى. جامبىل توپىراعىندا دۇنيەگە كەلگەن ول الماتىداعى قازاق مەملەكەتتىك مەديتسينا ۋنيۆەرسيتەتىنە 1998 جىلى وقۋعا ءتۇسىپ, ەل استاناسى اقمولاعا اۋىسۋىنا بايلانىستى, وقۋ ورنى 2000 جىلى استاناعا كوشكەندە ول دا العاش سارىارقا تورىنە تابان تىرەيدى. ەڭبەك جولىن 2003 جىلى قالاداعى №2 قالالىق بالالار اۋرۋحاناسىندا حيرۋرگيا بولىمشەسىنىڭ مەدبيكەسى بولىپ باستاعان. 2004-2015 جىلدار ارالىعىندا №2 پەريناتالدى ورتالىقتا اكۋشەر-گينەكولوگ بولىپ ەڭبەك ەتەدى. 2015 جىلى جولداسى جۇمىس ىستەيتىن استانا توتەنشە جاعدايلار دەپارتامەنتى №5 مامانداندىرىلعان ءورت ءسوندىرۋ بولىمىنە دارىگەر بولىپ جۇمىسقا ورنالاسادى.
– قازىرگى تاڭدا قالادا ءورت قاۋىپسىزدىگى بويىنشا ءبىز سياقتى 24 ءبولىم بولسا, سونىڭ ىشىندە سەگىزى – مامانداندىرىلعان. ءبىزدىڭ ءبولىم سارىارقا اۋدانىنا قارايدى, بىراق دارىگەرلەر قابانباي باتىر كوشەسىندەگى №3 مامانداندىرىلعان ءورت ءسوندىرۋ بولىمىندە 101 جانە 112 قىزمەتتەرىمەن بىرگە وتىرامىز. بۇل جەردەن قالانىڭ كەز كەلگەن جەرىنە بىردەي ۋاقىتتا جەتە الامىز. شۇعىل وقيعا بولماعان كەزدە گارنيزونداعى بارلىعى 1500, ءبىر اۋىسىمداعى 200-دەن استام قىزمەتكەردىڭ دەنساۋلىعىن باقىلاپ, ءارتۇرلى اۋرۋلاردىڭ الدىن الۋ بويىنشا ءىس-شارالار جۇرگىزەمىز. ال اپاتتى جاعداي تۋىنداعاندا وقيعا ورنىندا زارداپ شەككەندەردى عيمارات سىرتىنا الىپ شىققاننان كەيىن عانا ولارعا العاشقى مەديتسينالىق كومەك كورسەتۋدى باستايمىز, – دەيدى گۇلجان امىرەەۆا.
تاجىريبەلى دارىگەر ەكى جىلدىق پاندەميا كەزىندە دە جەكە قۇرامدى قاۋىپتى اۋرۋدان ەمدەۋ, ءتيىمدى پروفيلاكتيكالىق جۇمىستار جۇرگىزۋ, كوروناۆيرۋستى انىقتاۋ بويىنشا قارقىندى جۇمىس جۇرگىزىپ, اۋىر كەزەڭدە ەلوردا مەديتسيناسىنىڭ دامۋىنا زور ۇلەس قوستى. سول ءۇشىن 2020 جىلى مەملەكەت باسشىسىنىڭ اتىنان «حالىق العىسى», بىلتىر دەنساۋلىق ساقتاۋ مينيسترىنەن «دەنساۋلىق ساقتاۋ ىسىنە قوسقان ۇلەسى ءۇشىن» ماراپاتىنا يە بولدى. ودان باسقا دا كوپتەگەن العىس حاتتارعا يە بولىپ ءجۇر. دەگەنمەن اق حالاتتى ابزال جان ءۇشىن بۇل ماراپاتتاردان بۇرىن ءوزى شيپاسىن دارىتقان ناۋقاستاردىڭ, زارداپ شەككەن ادامداردىڭ ءومىرىن اجالدان اراشالاپ قالعان ساتتەگى ولاردىڭ باتاسى مەن العىسىن الۋ بارىنەن دە ماڭىزدى.
