ەلوردادا ۋلى گازدى باقىلايتىن داتچيكتەردىڭ ارقاسىندا ءبىر وتباسى امان قالدى. توتەنشە جاعداي «كوكتال-2» تۇرعىن الابىندا بولعان.
«ساعات 12-دەن 15 مينۋت وتكەندە 112 قىزمەتىنە جەدەل جاردەم ستانساسىنان اقمولا كوشەسىندەگى ۇيلەردىڭ ءبىرىندە تۇراتىن ازاماتتاردىڭ ءيىس گازىنان ۋلانۋ بەلگىلەرىمەن اۋرۋحاناعا جاتقىزىلعانى تۋرالى حابارلاما كەلىپ ءتۇستى. جەدەل جاردەمدى شاقىرعان كەلىنشەكتىڭ ايتۋىنشا, ساعات تۇنگى 2-دە ۋلى گازدى باقىلايتىن داتچيك بەلگى بەرە باستاعان. بۇل داۋىسقا ويانعان ول دەرەۋ ءۇيدىڭ ەسىك-تەرەزەسىن اشىپ جەلدەتىپ, قايتا ۇيىقتاعان. تاڭەرتەڭ ەكى بالاسىن مەكتەپكە جونەلتىپ, كىشى بالاسىمەن ۇيدە قالعان كەلىنشەكتىڭ جۇرەگى اينىپ, باسى اينالا باستاعان» دەلىنگەن قالالىق توتەنشە جاعداي دەپارتامەنتىنىڭ حابارلاماسىندا.
ساعات 12-لەر شاماسىندا جەدەل جاردەم بريگاداسى الگى كەلىنشەكتى بالاسىمەن بىرگە اۋرۋحاناعا اپارىپ, تەكسەرەدى. دەنساۋلىقتارىنىڭ قالىپتى ەكەنىنە كوزدەرى جەتكەن سوڭ, ۇيلەرىنە جىبەرەدى.
ەسكە سالا كەتەيىك, سارىارقا اۋدانىنىڭ توتەنشە جاعدايلار باسقارماسى وكىلدەرى بۇل ۇيگە ۋلى گازدى باقىلايتىن داتچيكتەردى اقپان ايىندا ورناتقان.
