iKomek: جەدەل شەشىم قابىلدانادى
«استانا – اقىلدى قالا» جوباسى اياسىندا ەلوردانى ءتيىمدى باسقارۋ, استانالىقتار مەن قالا قوناقتارىنا قاۋىپسىز جانە جايلى ورتا قالىپتاستىرۋ ماقساتىندا 2017 جىلدىڭ جەلتوقسان ايىندا «iKomek» قالالىق مونيتورينگ جانە جەدەل ارەكەت ەتۋ ورتالىعى قۇرىلعان بولاتىن. ەندى, مىنە, «iKomek»-كە «Smart Astana» ءموبيلدى قوسىمشاسى ارقىلى ءوتىنىش بەرۋگە مۇمكىندىك تۋدى. اۆتوماتتى تۇردە جۇيەگە كەلىپ تۇسكەن ونلاين-ءوتىنىش بىردەن باقىلاۋعا الىنادى. ودان ءارى «iKomek» ورتالىعى اتالعان ءوتىنىشتى جاۋاپتى ورىنداۋشىلارعا جىبەرەدى. دەمەك, كومەك سۇراعان ءاربىر ادامعا Google Play جانە Apple Store جۇيەسىنەن «Smart Astana» قوسىمشاسىن جۇكتەپ الۋ جەتكىلىكتى.
جۇزدەگەن مەكەمەگە قاتىستى سۇراق – 109 نومىرىنە
iKomek ورتالىعىن قۇرۋداعى نەگىزگى تۇجىرىمداما اقش-تىڭ 311 جانە 911 قىزمەتىنىڭ يدەياسىنان تۋىنداعان. ماسەلەن, 311 ءنومىرى اقش-تىڭ 300-دەن اسا قالاسىندا مەملەكەتتىك جانە فەدەرالدىق قىزمەتتىڭ 4 مىڭ ءتۇرى بويىنشا جۇمىس جۇرگىزەدى دەسەدى. ونداعى قالالىق سەرۆيس ورتالىعىنىڭ وپەراتولارىمەن تۇرعىندارعا تاۋلىكتىڭ كەز كەلگەن ۋاقىتىندا حابارلاسۋعا مۇمكىندىك قاراستىرىلىپتى.
ال استاناداعى iKomek ورتالىعىنىڭ 109 ءنومىرى اقش-تىڭ وسى 311 قىزمەتىنە ۇقساستىرىلىپ قۇرىلعان. بۇگىندە سۋ, جىلۋ, ەلەكتر ەنەرگياسى, كوممۋنالدىق تولەم (ەرتس), قوعامدىق كولىك سياقتى بارلىق كوممۋنالدىق قىزمەت جونىندەگى كولل-ورتالىقتار iKomek ورتالىعىنا بىرىكتىرىلگەن.
– استانالىقتارعا ىڭعايلى بولۋ ءۇشىن قۇرىلعان بۇل ورتالىق كوممۋنالدىق قىزمەتتەر مەن قالالىق كەڭسەلەرمەن ءوزارا ءىس-قيمىل جاساۋعا مۇمكىندىك بەرەدى, – دەيدى iKomek مونيتورينگ جانە جەدەل ارەكەت ەتۋ ورتالىعىنىڭ باسشىسى جاننات ءدۇبىروۆا.
قازىرگى ۋاقىتتا قالالىق اكىمدىكتىڭ 17 باسقارماسى مەن 4 اۋداندىق اكىمدىك جانە 33 كوممۋنالدىق قىزمەت, 605 پيك, 81 ليفت شارۋاشىلىعىنا باعىتتالعان سۇراقتاردى 109 قىسقا نومىرىنە حابارلاسىپ, قويۋعا بولادى. ايتا كەتۋ كەرەك, ورتالىققا قالالىق نەمەسە موبيلدىك بايلانىس تەگىن. وسىلايشا بۇرىن قوڭىراۋعا جاۋاپ بەرمەيتىن كوممۋنالدىق قىزمەتتەردىڭ ماسەلەسى بىرجاقتى بولدى.
الداعى ۋاقىتتا 112 قىزمەتى قۇرىلادى
سونداي-اق زامان اعىمىنا قاراي ورتالىقپەن تەك تەلەفونمەن عانا ەمەس, الەۋمەتتىك جەلىلەر ارقىلى دا حابارلاسۋعا مۇمكىندىك قاراستىرىلعان. وتكەن جىلدىڭ قاڭتارىنان باستاپ فەيسبۋك پەن ينستاگرامعا تىركەلگەن ورتالىققا تەك عالامتوردىڭ وزىنەن 12 اي ىشىندە 90 مىڭنان اسا ءوتىنىش ءتۇسىپتى. جاقىندا ورتالىق تەلەگرام-بوت پەن قالالىق اكىمدىك سايتىنا ەنگىزىلسە, ەندى ارنايى ءموبيلدى قوسىمشا ىسكە قوسىلدى. قالا باسشىلىعىنا اپتانىڭ ءار كۇنىندە تاۋلىك بويى قولجەتىمدى بولاتىن بۇل قوسىمشا قارجىمەن قاتار, ۋاقىتتى دا ۇنەمدەي تۇسپەك. ماسەلەن, بۇرىن اپاتتى جاعدايلار جونىندەگى اقپاراتتار باقىلاۋعا ىڭعايسىز ءارى اقىلى SMS-حابارلامالار تۇرىندە جىبەرىلىپ كەلگەن ەكەن. جاننات ءدۇبىروۆانىڭ مالىمەتىنشە, ورتالىققا ءبىر جىل ىشىندە ميلليوننان اسا ءوتىنىش ءتۇسىپ, ونىڭ 80 پايىزى ءبىرىنشى حابارلاسۋدان سوڭ شەشىلىپتى.
جان-جاقتى وقىتىلىپ, بىلىكتىلىكتەرىن ارتتىرۋ كۋرستارىنان وتكەن كاسىبي 78 وپەراتور قالاداعى بارلىق كوممۋنالدىق قىزمەت پەن تىرشىلىكپەن قامتاماسىز ەتۋ جونىندەگى كەز كەلگەن سۇراق بويىنشا حابارلاسقان تۇرعىندارعا مۇدىرمەي جاۋاپ بەرەدى. بارلىق ءوتىنىش تىركەۋ نومىرىمەن تۇرعىندار شاعىمىنىڭ ءتىزىمىنە ەنگىزىلىپ, ءارى قاراي ماسەلە بەلگىلى ءبىر ۋاقىتتا شەشىلۋ ءۇشىن مەملەكەتتىك ورگاندار مەن كوممۋنالدىق قىزمەتتەرگە بەرىلەدى. ءار وپەراتور 1300 قىزمەت ءتۇرى بويىنشا جاۋاپ بەرۋگە قاۋقارلى. ماماندار قوڭىراۋعا 16 سەكۋندتا, #Astana109 حەشتەگىن بەلگىلەسەڭىز, الەۋمەتتىك جەلىدە 10 مينۋتتا نازار اۋدارىپ, سۇراق 7 كۇن ىشىندە قارالادى.
كۇن سايىن 5 مىڭنان 14 مىڭعا دەيىن ءوتىنىش كەلىپ تۇسسە, ورتا ەسەپپەن كۇنىنە 2 مىڭ ءوتىنىش بويىنشا جۇمىس جۇرگىزىلەدى ەكەن. ناتيجەسىندە سوڭعى ۋاقىتتا اكىمدىك اپپاراتى مەن باسقارمالاردىڭ, اۋدان اكىمدىكتەردىڭ كەڭسەسىنە كەلەتىن حاتتار 20 پايىزعا تومەندەگەن كورىنەدى.
زاماناۋي تسيفرلىق تەحنولوگيالاردى ءتيىمدى پايدالانۋدىڭ ۇلگىسى بولعان بۇل تاجىريبە الداعى ۋاقىتتا ەلىمىزدىڭ بارلىق وڭىرىندە قولدانىلماق.
الداعى ۋاقىتتا اقش-تىڭ 911 قىزمەتىنە ۇقساس 112 قىزمەتىن قۇرۋ جوسپارلانۋدا. ياعني وسى قىزمەتكە قالانىڭ توتەنشە جاعداي جونىندەگى 101, 102, 103 نومىرلەرى ءبىر كولل-ورتالىققا بىرىكتىرىلمەك.