2-3 شىلدە كۇندەرى «Seedspace Nur-Sultan» قالالىق يننوۆاتسيالىق ورتالىعى الاڭىندا Seedstars World Tour شەڭبەرىندەگى ستارتاپ جوبالار ۇلتتىق بايقاۋى ءوتتى. ونى Astana Innovations كومپانياسى قر تۇڭعىش پرەزيدەنتى – ەلباسى قورىنىڭ قولداۋىمەن جانە Seedstars حالىقارالىق بيزنەس-ينكۋباتورىمەن بىرلەسىپ ۇيىمداستىردى.
حاكاتون – باعدارلامالىق قامتۋدى ازىرلەۋشى ءار سالا ماماندارىنىڭ ءبىر فورۋم اياسىندا قاندايدا ءبىر جوبانى بىرلەسىپ اتقارۋىن بىلدىرەدى. بۇل جولعى شارانىڭ فورماتى – «ينۆەستيتسياعا قالاي دايىن بولۋ كەرەك» بۋتكەمپى, وندا حالىقارالىق مەنتورلاردىڭ قاتىسۋىمەن ءبىلىم بەرۋ سەسسيالارى جۇرگىزىلەدى.
بايقاۋعا قاتىسۋ ءۇشىن 40-تان استام قازاقستاندىق ستارتاپ تىركەلدى. فينالعا 10 كوماندا شىعىپ, شەتەلدىك جانە جەرگىلىكتى ساراپشىلاردىڭ مەنتورلىق قولداۋىنا يە بولدى. سونىمەن قاتار, ولار ورتالىق جانە شىعىس ەۋروپا, ورتا ازيا ەلدەرى اراسىنداعى Seedstars وڭىرلىك ءسامميتى (CEE Summit) بايقاۋىنىڭ كەلەسى كەزەڭىنە شىعۋ مۇمكىندىگى ءۇشىن تارتىسقا ءتۇستى.
مۇنان باسقا, بايقاۋدا جۇلدەلى ورىن العان كوماندالار Seedspace Nur-Sultan الاڭىندا Investment Readiness Program-عا قوسىلىپ, ينۆەستورلارعا ءوز يدەيالارىن كورسەتتى جانە مەنتورلار مەن كاسىپكەرلەردىڭ اۋقىمدى جەلىسىنە قول جەتكىزدى.
كونكۋرس جەڭىمپازدارى ءۇش ايلىق Growth Program باعدارلاماسىنا قاتىسىپ, Seedstars Global Summit اياسىندا باس جۇلدە 500 000 اقش دوللارى ءۇشىن تارتىسۋعا مۇمكىندىك الادى.
ايتا كەتەيىك, Seedspace Nur-Sultan تمد اۋماعىنداعى العاشقى حالىقارالىق يننوۆاتسيالىق الاڭ بولىپ تابىلادى. مۇندا بەلسەندى كاسىپكەرلەر, فريلانسەرلەر جانە تسيفرلاندىرۋ ماماندارى تەحنولوگيالار مەن يننوۆاتسيالار ارقىلى قوعامنىڭ ءومىر ءسۇرۋ دەڭگەيىن كوتەرەتىن جوبالارمەن جۇمىس ىستەيدى.
