نۇر-سۇلتان قالاسىندا «استانا – ادالدىق الاڭى» جوباسى اياسىندا قوعامدىق باقىلاۋدىڭ ينتەراكتيۆتى كارتاسى ىسكە قوسىلدى.
ينتەراكتيۆتى كارتا قالالىق ورتانى جاقسارتۋ, سونداي-اق بيۋدجەت قاراجاتىنىڭ جۇمسالۋىن باقىلاۋ, شاعىمدار, پىكىرلەر جيناۋ جانە اقپاراتتى تالداۋ ءۇشىن جالپىعا قولجەتىمدى جاڭا سەرۆيس بولماق. «ەگەر جولداردا جوندەۋ جۇمىستارى جۇرگىزىلىپ جاتسا, نەمەسە كەرىسىنشە, جول قاناعاتتانعىسىز جاعدايدا جانە جوندەۋ جۇمىستارى ۇزاق ۋاقىت جۇرگىزىلمەسە, ازاماتتار ينتەراكتيۆتى كارتا سايتىنا كىرە الادى (www.publicbudget.kz). قالا كارتاسىنان نىساندى تاۋىپ, ءتيىستى پىكىر قالدىرۋى قاجەت. حابارلامالاردى جەدەل شارالار قابىلداناتىن جوبا قىزمەتكەرلەرى قاداعالايدى. وسىلايشا ءبىز ازاماتتىق باقىلاۋ ينستيتۋتىن كۇشەيتىپ, ەلوردا تۇرعىندارىنىڭ قالالىق پروتسەستەرگە تارتىلۋ كورسەتكىشىن ارتتىرعىمىز كەلەدى» دەيدى جاڭا سەرۆيستىڭ جۇمىسى جونىندە قالا اكىمىنىڭ ورىنباسارى ارمان تۇرلىبەك. كارتادا جولداردى جوندەۋ جانە سالۋ جونىندەگى دەرەكتەر عانا ەمەس, مەكتەپتەر, ەمحانالار سياقتى بارلىق الەۋمەتتىك نىساندارعا بولىنگەن بيۋدجەتتىك قاراجات جونىندە مالىمەتتەر كورسەتىلەتىن بولادى. ەلوردا تۇرعىندارى قانداي دا ءبىر وبەكتىنىڭ قىزمەتىنە قاتىستى كەز كەلگەن سيپاتتاعى ءوتىنىشتى قالدىرا الادى. ماسەلەن, مەكتەپتەردە ىرىكتەۋگە قاتىستى ساۋالدار, ەمحانادا مەديتسينالىق قىزمەت كورسەتۋدىڭ ساپاسى نەمەسە مەملەكەتتىك ورگانعا شاعىم بولۋى مۇمكىن. سونىمەن قاتار سەرۆيس كومەگىمەن ەلوردا تۇرعىندارى قالالىق ورتانى جاقسارتۋ بويىنشا شاعىمدار مەن ۇسىنىستاردى دا قالدىرا الادى. ول ءۇشىن www.publicbudget.kz سايتىنا قاراپ ءجۇرىڭىز.
