جۋىردا iQala قالالىق قىزمەت تۇرلەرىنىڭ بىرىڭعاي ورتالىعى الاڭىندا اشىق فورماتتاعى بيزنەس-جوبالار تۇساۋكەسەرى ءوتتى. بۇل شاراعا «بيزنەستىڭ جول كارتاسى – 2020» باعدارلاماسىنىڭ شەڭبەرىندە مەملەكەتتىك گرانت الۋعا ۇمىتكەرلەر قاتىستى. وسى باعدارلاما شەڭبەرىندە مەملەكەتتىك گرانتتار بەرۋگە 111 ملن تەڭگە قاراستىرىلعانىن ايتۋ ءلازىم. بۇل گرانتتار شاعىن كاسىپكەرلىك سۋبەكتىلەرىنە, سونىڭ ىشىندە, جاس جانە كاسىبىن جاڭادان اشقان كاسىپكەرلەرگە, مۇگەدەكتەرگە جانە 50 جاستان اسقان ازاماتتارعا بەرىلەدى. قايتارىمسىز قارىز اقشانى العان ادامدار ەكونوميكانىڭ, ءونىم وڭدەۋشى ونەركاسىپ سالالارىنىڭ باسىمدىق بەرىلگەن سەكتورلارىندا جاڭا بيزنەس-يدەيالارىن جۇزەگە اسىرادى. باعدارلامانىڭ ەلورداداعى اكىمشىسى – ينۆەستيتسيالار جانە كاسىپكەرلىكتى دامىتۋ باسقارماسى.
جوبالار قالاي باعالاندى؟
جاستار جىلىنا ارنالعان جول كارتاسىنا (بۇل قۇجات ۇكىمەت قاۋلىسىمەن بەكىتىلدى) سايكەس, 29 جاسقا دەيىنگى جاس كاسىپكەرلەرگە گرانتتار بەرۋ ءۇشىن رەسپۋبليكالىق بيۋدجەتتەن قوسىمشا 75 ملن تەڭگە ءبولىندى. وسىلايشا, گرانتتاردى قارجىلاندىرۋعا باعىتتالعان قاراجاتتىڭ جالپى كولەمى شامامەن 186 ملن تەڭگەگە كوبەيدى.
بايقاۋعا قاتىسۋشىلاردان 250 ءوتىنىش تۇسكەن. بايقاۋ كوميسسياسى سونىڭ ىشىندە 63 جوبانىڭ يەلەرىنە مەملەكەتتىك گرانتتار بەرۋگە شەشىم قابىلدادى. ۇزدىك شىققان جوبالار بيزنەس يدەيانىڭ جاڭاشىلدىعىمەن, باسەكەگە قابىلەتتىلىگىمەن جانە بيزنەس اشۋعا دايىندىعى سياقتى كريتەريلەرمەن باعالاندى. ءبىر گرانتتىڭ سوماسى – 3 ملن تەڭگەگە دەيىن. جوبالاردى باعالاۋدى ەلوردا ءماسليحاتى بەكىتكەن بايقاۋ كوميسسياسى وتكىزدى. ونىڭ قۇرامىنا نازارباەۆ ۋنيۆەرسيتەتىنىڭ, قالالىق حالىقتى جۇمىسپەن قامتۋ ورتالىعىنىڭ, قوعامدىق ۇيىمداردىڭ وكىلدەرى, ءارتۇرلى كاسىپورىنداردىڭ جەتەكشىلەرى, كاسىپكەرلەر جانە Astana Hub-تىڭ قىزمەتكەرلەرى كىردى.
بايقاۋ اشىق ءوتتى
تۇساۋكەسەر راسىمىنە ءوتىنىش بەرگەن ازاماتتاردىڭ بارلىعى قاتىستى. ءاربىر قاتىسۋشىعا ءوزىنىڭ بيزنەس-جوباسىن جۇرتقا تانىستىرۋعا 3 مينۋت, بايقاۋ كوميسسياسى مۇشەلەرىنىڭ سۇراقتارىنا جاۋاپ بەرۋگە 2 مينۋت ءبولىندى. داۋىس بەرۋ ءراسىمى بايقاۋ كوميسسياسىنىڭ ءاربىر مۇشەسىنىڭ جەكە جازباسى بويىنشا ونلاين-تارتىپپەن وتكىزىلدى. اقپاراتتار بىردەن سەرۆەرگە ءتۇسىپ, ۇمىتكەرلەر ناتيجەلەرىنىڭ مالىمەتتەر بازاسىنا ەنگىزىلدى. بۇل جەردە مۇمكىندىگى شەكتەۋلى ۇمىتكەرلەرگە عانا بەلگىلى ءبىر ارتىقشىلىقتار بەرىلدى.
ءبىر قۋانارلىعى, اشىق بايقاۋ جۋىردا عانا ەسىگىن ايقارا اشقان iQala ورتالىعىندا ءوتتى. بۇل – قالا اكىمدىگى مەن «استانا – ادالدىق الاڭى» اتتى سىبايلاس جەمقورلىققا قارسى جوبانىڭ بىرىككەن جۇيەسى. بارلىق راسىمدەردىڭ اشىقتىعى مەن ادىلدىگىن قامتاماسىز ەتۋ ماقساتىندا, «استانا – ادالدىق الاڭى» جوباسىنىڭ قاعيداتتارىنا سايكەس, بارلىق بيزنەس-جوبالاردى تىڭداۋ كەزىندە Facebook-كە تىكەلەي ونلاين-كورسەتىلىم جۇرگىزىلدى. بۇل كەزدە بايقاۋعا قاتىسۋشىلار زالدا وتىرىپ, ءبىر-بىرىنە قولداۋ كورسەتتى.
IT-سالاسىنداعى جاڭاشىل جوبالار كوپ كەزدەستى
ۇسىنىلعان جوبالاردىڭ اراسىندا اقپاراتتىق تەحنولوگيالار (IT), دەنساۋلىق ساقتاۋ, ءبىلىم بەرۋ, جەڭىل ونەركاسىپ, ازىق-تۇلىك, بالالار ويىنشىقتارىن شىعارۋ جانە وزگە دە سالالارعا قاتىستى يدەيالار بولدى. قاتىسۋشىلارعا بيزنەس-جوبالارىن دايىنداۋ بارىسىندا «اتامەكەن» ۇلتتىق كاسىپكەرلەر پالاتاسىنىڭ كوپ كومەك كورسەتكەنىن اتاپ ايتۋىمىز كەرەك. نەگىزىنەن العاندا, IT-سالاسىنداعى جاڭاشىل جوبالار كوبىرەك كەزدەستى. مۇنى بايقاۋ كوميسسياسىنىڭ مۇشەلەرى جاريا ەتتى.
گرانتتار بايقاۋىنىڭ جەڭىمپازدارىنىڭ ءبىرى, ماتەماتيكا مۇعالىمى, «سمارت ءبىلىم» ماتەماتيكالىق ورتالىعىنىڭ جەتەكشىسى ارالبەك بەرىكۇلى 5-6 سىنىپ وقۋشىلارىنا ارنالعان ماتەماتيكا وقۋلىعىن تانىستىردى. ءبىر عاجابى, ونىڭ ستاندارتتى وقۋلىقتاردان ايىرماشىلىعى – كىتاپ تولىقتاي ەسەپتەردەن تۇرادى. «كادىمگى مەكتەپ وقۋلىقتارىندا ەسەپتەر از. ونىڭ ورنىنا ەرەجەلەر, تاقىرىپقا تۇسىندىرمەلەر بەرىلەدى. سوندىقتان, بالالاردىڭ وتكەن تاقىرىپتى ساناسىنا سىڭىرۋگە مۇمكىندىگى جوق. تاقىرىپتى تولىقتاي مەڭگەرۋ ءۇشىن, ءبىزدىڭ وقۋلىعىمىزدا 50-60 ەسەپ بەرىلەدى. ءار ءبولىمنىڭ QR-كودى بار. بالا سول كودتى كوشىرىپ الىپ, ارنايى سايتقا كىرەدى. ول جەردە بەينەجازبا اشىلىپ, مۇعالىمدەر ساباقتىڭ تاقىرىبىن قاراپايىم تىلمەن, تاپتىشتەپ ءتۇسىندىرىپ بەرەدى. بۇعان قوسا, سايتتا باسقا ەسەپتەر دە بار. ونى ءوز بەتىمەن شىعارعان وقۋشى تاقىرىپتى تەرەڭ مەڭگەرەدى. گرانت بىزگە وسى ءبىلىم بەرۋ جوباسىن جۇزەگە اسىرۋعا قاجەت» دەپ ءتۇسىندىردى «سمارت ءبىلىم» ماتەماتيكا ورتالىعىنىڭ جەتەكشىسى.
