5 ماۋسىم كۇنى نۇر-سۇلتان قالاسىنىڭ اكىمى باقىت سۇلتانوۆ پەن قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى اليك شپەكباەۆ iQala قىزمەتتەر ورتالىعىنىڭ اشىلۋىنا قاتىسىپ, سالتاناتتى جاعدايدا ونىڭ تاسپاسىن كەستى.
– ءبىزدىڭ IQala جوبامىز ءبىر عانا ماقساتتى – تۇرعىنداردىڭ مەملەكەتتىك قىزمەت الۋداعى پروتسەستەرىن بارىنشا وڭايلاتۋدى كوزدەيدى. ازاماتتار بۇدان بىلاي قىزمەتتەر مەن كەڭەستەر الۋ, ءمور باستىرۋ ءۇشىن ءتۇرلى مۋنيتسيپالدى مەكەمەلەرگە بارىپ جۇرمەيدى. «ءبىر تەرەزەگە» جۇگىنىپ, بارلىق شارۋاسىن سول ارقىلى تىندىرا الادى,– دەدى بىرەگەي تۇتىنۋشىلارعا قىزمەت كورسەتۋ ورتالىعىنىڭ اشىلۋى كەزىندە قالا اكىمى باقىت تۇرلىحانۇلى. –IQala – بۇل تۇرعىندار مەن قالا بيلىگى – اتقارۋشى ورگاندار, قالالىق جانە كوممۋنالدىق قىزمەتتەر, بيزنەستى قولداۋ ينستيتۋتتارى اراسىندا ءوزارا ءىس-قيمىلدىڭ جاڭا فورماتى. IQala الاڭى – قالاداعى قىزمەتتەردىڭ ءبىر جەرگە شوعىرلاندىراتىن ينتەگراتورى بولىپ تابىلادى.
قالا اكىمى باقىت سۇلتانوۆ پەن اگەنتتىك باسشىسى اليك شپەكباەۆ جاڭا ورتالىقتىڭ تەحنيكالىق مۇمكىندىكتەرىمەن تانىسىپ, مۇندا تۇرعىنداردىڭ بارلىق ساناتتاعى توپتارىنا قىزمەت كورسەتۋگە قولايلى ءارى جايلى ەكەندىگىنە كوز جەتكىزدى.
اتالعان شارا «استانا – ادالدىق الاڭى» جوباسى شەڭبەرىندە ىسكە اسىرىلدى. كەڭسە «قالا بيلىگى – تۇرعىندار» قارىم-قاتىناسىنان تۋىندايتىن تۇرمىستىق جەمقورلىقتى جويىپ قانا قويماي, تسيفرلاندىرۋ سالاسىندا زاماناۋي تەحنولوگيالاردى قولدانا وتىرىپ, قالالىقتاردىڭ ءومىرىن جاقسارتۋعا مۇمكىندىك بەرەدى.
ايتا كەتەيىك, «استانا – ادالدىق الاڭى» جوباسى 2018 جىلى ساۋلەت, قالا قۇرىلىسى جانە جەر قاتىناستارى ماسەلەلەرى بويىنشا ۇسىنىلاتىن قىزمەتتەردىڭ بيزنەس-پروتسەستەرىنە تالداۋ جاساعان بولاتىن.
«تالداۋ ناتيجەسى وسى سالادا كورسەتىلەتىن قىزمەتتەردىڭ قوسارلانعان قۇجاتتار اينالىمى, تۇتىنۋشىمەن تىكەلەي بايلانىس جاسالۋى, كوپتەگەن اكىمشىلىك توسقاۋىلدار قويىلۋى, قىزمەتتەردىڭ ۇزاق مەرزىمدىلىگى مەن تارتىپتەردىڭ ورىندالماۋى ورىن الاتىندىعىن جانە تۇرعىندار ءۇشىن جايسىزدىقتار تۋعىزاتىن جاعدايلاردىڭ كەزدەسەتىندىگىن كورسەتتى» دەدى قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى استانالىق دەپارتامەنتىنىڭ باسشىسى جازيرا جىلقىشيەۆا.
دەپارتامەنت باسشىسى, سونداي-اق وتكەن جىلدىڭ شىلدە ايىندا بىرىڭعاي ورتالىق قۇرۋ جانە وندا قىزمەت كورسەتۋ پروتسەستەرىنە قاتىساتىن بارلىق مەكەمەلەردى توپتاستىرۋ تۋرالى باستاما كوتەرىلگەندىگىن اتاپ ءوتتى. مۇندا تۇرعىندار مەن شوب وكىلدەرىنە مەملەكەتتىك جانە مەملەكەتتىك ەمەس قىزمەتتەردى الۋ مەيلىنشە وڭتايلاندىرىلادى.
قىزمەت ورتالىعى قالا اكىمدىگىنىڭ باستاماسىمەن جانە مەملەكەتتىك اگەنتتىكتىڭ قولداۋىمەن «استانا – ادالدىق الاڭى» جوباسىنىڭ اياسىندا قۇرىلدى.
– IQala جۇمىسىنىڭ ناتيجەسىندە استانالىق مەكەمەلەردىڭ قىزمەت كورسەتۋ تيىمدىلىگى ارتادى, ونىڭ پروتسەستەرى جەڭىلدەتىلەدى, بارلىق وپەراتسيالار اشىق ءارى ايقىن جۇرگىزىلەدى» دەپ اتاپ ءوتتى باستامانى جۇزەگە اسىرۋشى «اstana اكك» اق باسقارما توراعاسىنىڭ ءبىرىنشى ورىنباسارى تەمىرلان نۇرعيساەۆ.
بۇگىندە مۇندا تۇرعىن ءۇي-كوممۋنالدىق قىزمەتتەر مەن كاسىپكەرلىككە قولداۋ كورسەتۋ ينستيتۋتتارىنىڭ 15 نەگىزگى كەڭەس بەرۋ قىزمەتى شوعىرلاندىرىلعان. اكىمنىڭ ايتۋىنشا, بىرەگەي ورتالىق جىل اياعىنا دەيىن 25 كومپانيانى توپتاستىرىپ, بارلىعى 130 ءتۇرلى قىزمەت كورسەتەتىن بولادى. ءوتىنىش بەرۋشىگە مەملەكەتتىك ورگاندار مەن تۇرعىن ءۇي-كوممۋنالدىق قىزمەتتەردىڭ 45 ءتۇرى بويىنشا قىزمەت الۋعا قولايلى بولۋ ءۇشىن وتىنىشتەر فورماسى جۇيەسى ازىرلەنىپ ىسكە قوسىلدى. سونىمەن قاتار, اتالعان وندىرىستەردى ىسكە قوسۋ ءۇشىن وپەراتورلاردى وقىتۋ جۇمىستارى جۇرگىزىلىپ جاتىر.
داۋلەت اساۋوۆ
