رەسپۋبليكا اۋماعىندا جىل سايىن ۇكىمەت, جەرگىلىكتى اكىمدىكتەر مەن ءبىلىم باسقارمالارى جاڭا وقۋ جىلىندا بارشا بۇلدىرشىندەردىڭ تولىق مەكتەپكە بارۋىن قامتاماسىز ەتىپ, وقۋ قۇرالدارى مەن كيىم-كەشەكتەرىن الۋىنا جاعداي جاساۋ ماقساتىندا «مەكتەپكە جول» اكتسياسىن ۇيىمداستىرىپ كەلەدى.
يمام بۇحاري مەن يمام مۇسلىمنەن كەلگەن حاديستە پايعامبارىمىز (س.ع.س.): «جەسىر مەن جەتىمگە كومەكتەسۋ اللاھ جولىندا جيحاد قىلعانمەن تەڭ» دەگەن. ال يمام ءماجاھدان جەتكەن حاديستە اللاھ ەلشىسى (س.ع.س.): «جەتىم مەن جەسىردىڭ اس-سۋى مەن كيىم-كەشەگى ءۇشىن ىستەگەندەر اللا جولىندا جيحاد قىلعان ءارى ءتۇنىن ناماز وقىپ, كۇندىزىن ورازا ۇستاۋمەن وتكىزگەن ادام سياقتى» دەيدى. اسىل ءدىننىڭ كەسىمى مەن ەل دامۋىنىڭ نەگىزگى ماقساتىنىڭ ءبىر باعىتتا ەكەندىگىن بايقاتقان سونداي ءبىر يگى شارا ەلوردامىزدىڭ ايشىقتى ءۇش مەشىتىندە وتكىزىلىپ, وندا جاڭا وقۋ جىلىن اسىعا كۇتكەن بۇلدىرشىندەرگە قاجەتتى وقۋ جابدىقتارى تاراتىلدى.
مەكتەپ وقۋشىلارىنىڭ ساعىنا كۇتكەن ماۋسىمىندا اتا-انالار بالالارىنا مەكتەپكە قاجەتتى وقۋ قۇرالدارى مەن كەرەك-جاراقتارىن, كيىم-كەشەكتەرىن ازىرلەۋگە كوشەدى. بۇل كەزدە جوقشىلىق قولىن بايلاپ, وسى كوشتەن كەيىندەۋ قالاتىن وتباسىلار دا بار ەكەنىن ەسكە سالعان قازاقستان مۇسىلماندارى ءدىني باسقارماسىنىڭ استانا قالاسى بويىنشا وكىل يمامى ناۋرىزباي قاجى تاعانۇلى وسىنداي ىزگى ىسكە اتسالىسىپ, قول سوزعان ازاماتتاردىڭ ەل ىشىندە از ەمەس ەكەندىگىن ايتتى.
بۇل كەشتە بۇلدىرشىندەردىڭ رياسىز قۋانىشىنا بولەنگەن اتا-انالار دا ريزاشىلىقتارىن جاسىرا الماي, يگى ىسكە مۇرىندىق بولعان بارشا ازاماتتارعا, اتالمىش شارانى وتكىزۋگە ۇيىتقى بولعان قازاقستان مۇسىلماندارى ءدىني باسقارماسىنىڭ استانا قالاسى بويىنشا وكىلدىگىنە, بارشا ءدىن قىزمەتكەرلەرىنە العىستارىن ءبىلدىردى.
بيىلعى «ءدىن مەن ءداستۇر جىلى» اياسىندا ءمۇفتيات ايقىنداپ بەرگەن ءتورت باعىتتى ىسكە اسىرۋ ماقساتىندا قمدب-نىڭ استانا قالاسى بويىنشا وكىلدىگى, «نۇر استانا» ورتالىق مەشىتى «مەيىرىمدىلىك مەكەنى» جوباسىن قولعا الىپ, جۇمىس جۇرگىزىپ كەلە جاتقانىنا دا ءبىرتالاي ۋاقىت بولدى. ەل يگىلىگىنە قىزمەت ەتۋدى باستى مىندەتىنە اينالدىرعان ەلوردانىڭ ورتالىق مەشىتى رەسپۋبليكالىق اكتسياعا وزىندىك ۇلەس قوسۋدى ماقسات تۇتىپ, جىل سايىن ايتۋلى اكتسيا اياسىندا قايىرىمدىلىق شارالارىن ۇيىمداستىرىپ كەلەدى. بۇلدىرشىندەرگە قۋانىش سىيلاعان وسى اكتسيا دا «مەيىرىمدىلىك مەكەنى» جوباسى اياسىندا وتكىزىلىپ وتىر. رەسپۋبليكالىق دەڭگەيدە قولعا الىنعان اكتسيا اياسىندا «نۇر استانا» ورتالىق مەشىتى مەن «ازىرەت سۇلتان» مەشىتىندە 250 وقۋشى, «عىلماني» مەشىتىندە 100 ءبۇلدىرشىن, جالپى سانى 700-دەن اسا بالا مەكتەپ فورماسى, وقۋ قۇرالدارىمەن قامتاماسىز ەتىلدى.
جايىق ناعىماش
