قازاقستاندىق شاعىن جانە ورتا بيزنەس وكىلدەرى كەدەن وداعىنان شاش-ەتەكتەن پايدا كورەدى. تىپتەن, كورەتىن پايداسى رەسەي جانە بەلارۋس كاسىپكەرلەرىنەن اسىپ كەتۋى مۇمكىن. مۇنداي وي كەشە ينتەگراتسيالىق ۇدەرىستەرگە ارنالعان ورتالىق كوممۋنيكاتسيالار قىزمەتىنىڭ بريفينگى بارىسىندا ايتىلدى.
وعان قاتىسقان باسەكەلەستىكتى قورعاۋ اگەنتتىگىنىڭ توراعاسى عالىم ورازباقوۆ, تابيعي مونوپوليالاردى رەتتەۋ اگەنتتىگى توراعاسىنىڭ ورىنباسارى اسىلبەك دۇيسەباەۆ كەدەن وداعى اياسىنداعى بايلانىس جايىندا جان-جاقتى اڭگىمەلەدى. سونداي-اق, اقتوبە وبلىسى اكىمىنىڭ ءبىرىنشى ورىنباسارى نۇرمۇحامبەت ابدىبەكوۆ ءوڭىردىڭ شەكارالاس ەلدەرمەن ساۋدا-ساتتىق ماسەلەسىن قوزعاپ, وبلىستىڭ بىرىككەن جوبالارى جايىمەن تانىستىردى.
تارقاتىپ ايتساق, رەسەيدىڭ جانە بەلارۋس رەسپۋبليكاسىنىڭ نارىعى قازاقستاندىق كاسىپكەرلەرگە مول مۇمكىندىك بەرەدى. ارينە, شىعاراتىن ونىمدەرى سول ەلدەردە سۇرانىسقا يە بولسا. ماسەلەن, باسقاسىن ايتپاعاندا,ماسكەۋ نارىعى جىلىنا 5 ملرد دوللاردى قۇرايدى ەكەن. «ەگەر دە شەكارالىق بەكەتتەگى كەدەندىك ءتارتىپتى جەڭىلدەتكەنىمىزدى جانە رەسەي مەن قازاقستان اراسىنداعى تاۋار اينالىمى 40 پايىزعا وسكەندىگىن ەسكەرسەك, بيزنەسىمىزدىڭ تاسى ورگە دومالايىن دەپ تۇر» دەدى ع. ورازباقوۆ.
ودان بولەك, ول ەۋرازيالىق ەكونوميكالىق كەڭىستىك اياسىنداعى سالانىڭ جوسپارلارىن ايتا كەتتى. ونىڭ ايتۋىنشا, «باسەكەلىستىك تۋرالى» زاڭعا ولار بىرقاتار ۇعىمداردى ەنگىزۋدى ۇسىنىپ وتىر. بۇل ۇعىمدار كاسىپكەرلەردىڭ قارجىلىق شىعىندارىن ازايتادى.
امانعالي شميتۇلى
