ءدامدىسىن-اي ءاسىپتىڭ, ءتاتتىسىن-اي سۇبەنىڭ
بۇرناعى كۇنى پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ قولداۋىمەن قۇرىلعان «وتباسىم» ۇلتتىق قۇندىلىقتار ورتالىعى «جۇمباقتاس» مەيرامحاناسىندا «ۇمىت بولعان ۇلتتىق تاعامداردى جاڭعىرتۋ» اتتى باسقوسۋ ۇيىمداستىرىپ, داستارقان جايدى.
شارا بارىسىندا قازاق حالقىنىڭ بىلامىق, جاۋجۇرەك, ۇلپەرشەك, كومەش, ءاسىپ, جورگەم, سۇبە اتتى جەتى ءتۇرلى تاعامىنىڭ جاسالۋ جولدارى تانىستىرىلىپ, ولاردىڭ ادام اعزاسىنا پايدالى جاقتارى ءسوز بولدى. جينالعان قوناقتار ۇمىت بولا باستاعان ۇلتتىق تاعامداردان ءدام تاتتى.
«بۇل – ورتالىق ۇجىمىنىڭ ەكىنشى جيىنى. اقپان ايىندا ۇلتتىق كيىمدەردى ناسيحاتتاۋ ماقساتىمەن جەتى باعىت بويىنشا 32 قازاقى كيىم ۇلگىسىن جۇرت نازارىنا ۇسىنعان ەدىك. ال بۇگىن جەتى ءتۇرلى ۇلتتىق تاعامدى جۇرتشىلىققا تانىستىرىپ, ءدام تاتىردىق» دەيدى جوبا اۆتورى, «وتباسىم» ۇلتتىق قۇندىلىقتار ورتالىعى ءتورايىمىنىڭ ورىنباسارى كامال الپەيىسوۆا. ول ۇلتتىق تاعامداردىڭ دايىندالۋ ءادىسىن جيناۋ ءۇشىن بىرنەشە وبلىستى ارالاعاندارىن ايتتى. سولاردىڭ ىشىندە ادامنىڭ ومىرگە كەلۋىنەن باستاپ قارتايعانعا دەيىنگى ارالىقتا ازىق ەتەتىن جەتى تاعامدى ىرىكتەپ العان.
ۇمىت بولعان ۇلتتىق تاعامداردى جاڭعىرتۋ, ولاردىڭ قازىرگى جاعدايدا دايىندالۋ تاسىلىمەن, تاماقتانۋ مادەنيەتىمەن, دەنساۋلىق ءۇشىن پايداسى جانە قۇندىلىعىمەن كوپشىلىكتى تانىستىرۋدى, سونداي-اق, وتباسىلىق جانە مەيرامحانالارداعى داستارقان ءمازىرىنە ەنگىزۋدى ماقسات ەتكەن ورتالىق ۇجىمى الداعى ۋاقىتتا قازاقى قوناقجايلىلىق مەكتەبىن اشپاق. «ۇلتتىق اس مازىرلەرىن حالىقارالىق «EXPO» كورمەسىندە دە ۇلىقتايمىز» دەيدى ولار.
«سۇبە وراماسى قابىرعادان دايىندالادى. ۇلكەن قوناق كۇتكەندە سۋىق باسىتقىنىڭ ورنىنا قولدانۋعا بولادى. سۇبە كوپ جاعدايدا مايلى بولىپ كەلەدى ءارى سىيلى تاباققا عانا سالىنادى. تاماقتى ازىرلەۋ ءۇشىن ءبىر-ءبىر جارىم ساعاتتاي ۋاقىت كەتەدى» دەيدى جامبىل وبلىسىنان كەلگەن اسپاز ءۇمiتجان جاپاروۆا. ول كەلiن بولىپ تۇسكەننەن باستاپ ەنەسiنەن ۇيرەنگەن بۇل تاعامدى وڭتۇستiك قازاقستان وڭىرىندە جيi ازiرلەيتiن كورiنەدi. ءۇمىتحان قازاق حالقىنىڭ ەت, قازى-قارتا, قۋىرداقتان باسقا دا ۇلتتىق تاعامدارى بارشىلىق ەكەنىن ايتادى. تەك كەڭىنەن ناسيحاتتاپ, جاڭعىرتۋ قاجەت.
اسحات رايقۇل