وتكەن سەنبى كۇنى ەلباسىنىڭ تاپسىرماسىن ورىنداۋ بارىسىنداعى شارالار تۋرالى ورتالىق كوممۋنيكاتسيالار قىزمەتىندە قر وڭىرلىك دامۋ مينيسترلىگى كاسىپكەرلىكتى دامىتۋ ساياساتى دەپارتامەنتىنىڭ ديرەكتورى باۋىرجان بەكەشوۆ پەن كاسىپكەرلىكتى دامىتۋ كوميتەتىنىڭ ءتورايىمى عاليا جولدىباەۆا مالىمدەمە جاسادى.
بريفينگتە عاليا جولدىباەۆا كەيىنگى جىلدارداعى جەكە كاسىپكەرلىك سۋبەكتىلەرىنە جۇرگىزىلگەن تەكسەرۋ جۇمىستارىنىڭ قورىتىندىسى تۋرالى اڭگىمە قوزعادى. ونىڭ ايتۋىنشا, 2013 جىلى مەملەكەتتىك ورگاندار 182 126 تەكسەرۋ جۇرگىزگەن ەكەن. ول 2012 جىلمەن سالىستىرعاندا 25 پايىزعا از.
2013 جىلدىڭ قورىتىندىسى بويىنشا اكىمشىلىك جازالاۋدىڭ جالپى سانىنداعى ايىپپۇل ۇلەسى 98 پايىزدى قۇراعان, ال بۇل مەملەكەتتىك ورگانداردىڭ ەسكەرتۋدى اكىمشىلىك جازالاۋ شارالارى رەتىندە قولدانۋدى قالامايتىنىن بىلدىرەدى. ايىپپۇلدىڭ سوماسى 13,8 ملرد تەڭگەنى قۇرادى جانە ونىڭ نەگىزگى ۇلەسى جوسپاردان تىس تەكسەرۋلەر بارىسىندا سالىنعان.
ال باۋىرجان بەكەشوۆ بيزنەستى دامىتۋدا اتقارىلىپ جاتقان شارالار تۋرالى ايتتى. ول: «مينيسترلىك جاقىندا پارلامەنتكە «رۇقساتتار جانە حابارلامالار تۋرالى» زاڭ جوباسىن ۇسىنادى جانە سول زاڭ كاسىپكەرلەرگە اۋىرتپالىق تۇسىرەتىن نەگىزسىز رۇقساتتارعا توسقاۋىل قوياتىن بولادى» دەدى. زاڭ قابىلدانار بولسا, كەز كەلگەن مەملەكەتتىك ورگان ءوز بەتتەرىنشە جاڭا رۇقساتتار ەنگىزە المايدى. سونىمەن قاتار, 2014 جىلدىڭ 1 قىركۇيەگىنە دەيىن ەلىمىزدە كاسىپكەرلىك قىزمەت ءۇشىن جاعدايدى تۇبەگەيلى جاقسارتۋ ماسەلەلەرى جونىندە زاڭ جوباسى ءازىرلەنەتىن بولادى.
رۇقسات بەرۋدى اۆتوماتتاندىرۋعا قاتىستى 2012 جىلى ليتسەنزيالاردىڭ بارلىق ءتۇرىن ۇسىنۋ ەلەكتروندى فورماتقا اۋىستىرىلعانى جانە 80 رۇقسات بەرۋ قۇجاتىنىڭ اۆتوماتتاندىرىلعانى بەلگىلى. 2013 جىلى تاعى دا 214 رۇقسات بەرۋ ءراسىمى سونداي فورماتقا كوشكەن-ءدى. جالپى, بارلىق قۇجاتتاردى ەلەكتروندى جۇيەگە الماستىرۋ 2015 جىلى اياقتالاتىن بولادى.
