كەشە ورتالىق كوممۋنيكاتسيالار قىزمەتىنىڭ بريفينگىنە كەلگەن «دامۋ» كاسىپكەرلىكتى دامىتۋ قورى» باسقارما ءتورايىمى ءلاززات يبراگيموۆا «بيزنەستىڭ جول كارتاسى – 2020» باعدارلاماسىنىڭ ءۇش جىلعى قورىتىندىسىمەن جانە 2014 جىلعى جوسپارلارىمەن ءبولىستى.
اتالمىش باعدارلاما ىسكە قوسىلعان 2010 جىلى كاسىپكەرلەرمەن 135 جوبا بويىنشا سۋبسيديا تۋرالى شارت جاسالسا, ءۇش جىلدا بۇل سان توعىز ەسە ءوسىپ, 1271 جوباعا جەتكەن. ءلاززات ەركەنقىزىنىڭ ايتۋىنشا, باستاپقى جىلى باعدارلاماعا وتاندىق كاسىپكەرلەردى تارتۋ جۇمىسى جۇرگىزىلسە, بۇدان كەيىنگى ۋاقىتتاردا باعدارلاما ەلىمىزدىڭ بارلىق وڭىرلەرىندە تولىققاندى جۇمىس ىستەي باستاعان.
2011 جىلى كاسىپكەرلەرگە ەڭ ءتيىمدى تەتىك – سۋبسيديالاۋ بولسا, باعدارلاما 2012 جىلى كەپىلدەندىرۋ تەتىگىمەن تولىقتى. ەڭ جەمىستىسى 2013 جىل بولدى. وسى جىلى مەملەكەتىمىزدىڭ بارلىق وبلىس ورتالىقتارىندا كاسىپكەرلەرگە قىزمەت كورسەتۋ ورتالىقتارى اشىلىپ, «ءبىر تەرەزە» قاعيداتى بويىنشا تەگىن كەڭەستەر الۋعا قول جەتكىزدى. سونداي-اق, بيىل «بيزنەس اۋماعى» اتتى بىرىڭعاي مەملەكەتتىك پورتال ىسكە قوسىلدى. ودان بولەك مۇمكىندىگى شەكتەۋلى ازاماتتارعا كاسىپكەرلىكپەن اينالىسۋعا جاردەم بەرەتىن «دامۋ-كومەك» باعدارلاماسى جۇزەگە اسىرىلا باستادى. ارناۋلى www.damu-komek.kz سايتى ارقىلى كومەككە مۇقتاج مۇگەدەك جاندارعا ءىرى بيزنەس قۇرىلىمدارىنداعى الەۋەتتى دەمەۋشىلەر قولۇشىن سوزدى. سونىڭ ارقاسىندا اعىمداعى جىلدىڭ جەلتوقسان ايىنا كەلگەندە سايتقا 1254 ءوتىنىش ءتۇسىپ, ولاردىڭ 863-ءى بويىنشا جاردەم بەرىلدى.
2010 جىلدان بەرى جالپى قۇنى 22 ملرد تەڭگە 251 كەلىسىمشارتقا قول قويىلعان
مەملەكەت سۋبسيديالاۋ كولەمىن جىل سايىن ۇلعايتۋدا
كەلەسى جىلدىڭ جوسپارلارىنا كەلسەك, كاسىپكەرلىكتى قولداۋ ورتالىقتارى ەلىمىزدىڭ بارلىق اۋداندارىندا اشىلماق. سونىمەن بىرگە سۋبسيديالارعا 32,4 ملرد تەڭگە ءبولىنىپ, سۋبسيديالاناتىن جوبالاردىڭ سانى 1,5 مىڭعا جەتۋى ءتيىس. ودان بولەك كەپىلدەندىرۋ تەتىگىمەن قولداۋ كورسەتىلەتىن كاسىپكەرلەردىڭ سانىن 500-گە جەتكىزۋ كوزدەلۋدە.
امانعالي شميتۇلى
