پرەزيدەنتتىككە ۇمىتكەر نۇرلان اۋەسباەۆ اقمولا وبلىسى اقمول اۋىلىندا بولىپ, تۇرعىندارمەن كەزدەستى.
اقمولداعى باستى ماسەلەنىڭ ءبىرى – دامىعان الەۋمەتتىك ينفراقۇرىلىمنىڭ جوعى. اتاپ ايتقاندا, اۋىلدا وقۋشى ورنى تاپشىلىعى بايقالادى. اقمولداعى بالا سانى ەسكى مەكتەپتەگى ورىن سانىنان الدەقايدا كوپ. سونىمەن قاتار تۇرعىندار بالاباقشا سالۋدى سۇرايدى. بۇل رەتتە نۇرلان اۋەسباەۆ ءوزىنىڭ سايلاۋالدى باعدارلاماسىندا الەۋمەتتىك ساياساتقا ەرەكشە كوڭىل بولىنگەنىن ايتتى. ۇمىتكەردىڭ پىكىرىنشە, ءبىلىم بەرۋ سالاسى مەملەكەت تاراپىنان ايرىقشا نازاردى تالاپ ەتەدى. مەديتسينا جانە ءبىلىم بەرۋ سالالارىنا ءجىو-دەن جىلىنا ەڭ كەمى 5-7%-دى ءبولۋدى ۇسىندى. جالپىۇلتتىق سوتسيال-دەموكراتيالىق پارتيا وكىلى مۇنداي شارانىڭ ينفراقۇرىلىم مەن جابدىقتى كەزەڭ-كەزەڭمەن جاڭارتىپ وتىرۋعا, دارىگەرلەر مەن مۇعالىمدەر ەڭبەكاقىسىنىڭ بانك قىزمەتكەرلەرى دەڭگەيىنە دەيىن كوتەرۋگە مۇمكىندىك بەرەتىندىگىن ايتتى. مۇنىڭ ماڭىزى زور, سەبەبى اتالمىش ماماندار ادامي كاپيتالدىڭ ساپاسىنا جاۋاپ بەرەدى, ال بۇل, ءوز كەزەگىندە, وتاندىق ەكونوميكانى دامىتۋ ءۇشىن نەگىزگى تالاپ.
سونداي-اق نۇرلان اۋەسباەۆ اقمولا وبلىسى قوياندى اۋىلىندا بولىپ, سايلاۋشىلارمەن كەزدەستى. كەزدەسۋ بارىسىندا ۇمىتكەر جينالعانداردى ءوزىنىڭ سايلاۋالدى باعدارلاماسىمەن تانىستىردى. اۋەسباەۆتىڭ پىكىرىنشە, قاتارداعى قازاقستاندىقتار جىل وتكەن سايىن كەدەيلەنە تۇسۋدە. ازىق-تۇلىك باعاسىنىڭ ۇدايى ءوسۋى قالىپتى جاعدايعا اينالدى. قاراپايىم حالىقتىڭ نەسيەگە دەگەن تاۋەلدىلىگى كۇن ساناپ كۇشەيىپ بارادى. ۇلتتىق بانك بولسا حالىقتى ەمەس, بانكيرلەردى بايىتىپ, بازالىق مولشەرلەمەنى جوعارىلاتۋدا. ۇمىتكەر ۇلتتىق بانك ساياساتىن قايتا قاراستىرۋ قاجەتتىگىن مالىمدەدى. باستى نازاردا وليگارحات قىزىعۋشىلىعى ەمەس, حالىق جاعدايى تۇرۋى ءتيىس. قوياندى ەلورداعا جاقىن ورنالاسقانىنا قاراماستان, جول جاعدايى, اۋىز سۋ جوقتىعى سەكىلدى ءالى دە شەشىلمەگەن بىرقاتار ماسەلە بار.
