قر پارلامەنتى ءماجىلىسىنىڭ VII شاقىرىلىم دەپۋتاتتارى, «اق جول» پارتياسى توراعاسى ازات پەرۋاشەۆ پەن پارتيا توراعاسىنىڭ ورىنباسارى قازىبەك يسا الماتىداعى سايلاۋشىلارمەن كەزدەستى.
قازىر قىتايعا جۇك كولىگىمەن تاۋار تاسۋشىلار ۇلكەن توسقاۋىلعا ۇشىراپ, جۇمىسى كەرى كەتۋدە. قورعاس, باقتى, مايقاپشاعاي, نۇرلى جول كەدەندەرىندە شەتەلگە كولىك كىرگىزۋدى ەلەكتروندى كەزەك ارقىلى جاساپ قويعان. بار ماسەلە وسى ەلەكتروندى كەزەكتەن تۋىنداپ وتىر. قاپتاعان كەزەكتىڭ شەتى-شەگى كورىنبەيدى. قازاقستاندىق جۇرگىزۋشىلەر كەزەگىن ايلاپ كۇتەدى. ال رەسەي مەن بەلورۋسسيانىڭ قۋاتتى لوگيستيكالىق كومپانيالارى جۇرگىزۋشىلەرى كەزەكسىز كىرىپ-شىعا بەرەدى, ولارعا توسقاۋىل جوق.
– ارقايسىمىزدا ءارى كەتسە 5-6 جۇك كولىكتەن بار, سوندىقتان رەسەي, بەلورۋسسيا كومپانيالارىمەن باسەكەلەسە المايمىز. قازىر كەزەكتە تۇرعانىمىزعا ەكى-ءۇش ايدان اسىپ كەتتى. وتكەندە مەنىڭ كەزەگىم 14 اقپاندا ەدى, ەندى ول ەكى ايعا كەيىن شەگەرىلىپ وتىر. شەتەل كومپانيالارى 100 مىڭ تەڭگە بەرىپ, كەزەگىن العا جىلجىتىپ جاتقانى كوپ, قايداعى ەلەكتروندى كەزەك بۇل؟! بوسقا تۇرعان ءار كۇن ءۇشىن ءار ماشينادان 100 دوللار ۇستالادى. شىعىنىمىز قازىر ميلليوننان اسىپ كەتتى. بۇل تىعىرىقتان شىعۋ ءۇشىن پاندەميا كەزىندە ەنگىزىلگەن ەلەكتروندى كەزەكتى الىپ تاستاپ, جاندى كەزەككە اۋىسۋ كەرەك نەمەسە 4 كەدەن بەكەتىنە دە كەزەككە تۇرا بەرۋگە رۇقسات بەرىلۋى ءتيىس. ال قازىر ءبىر كەدەن بەكەتىندە كەزەككە تۇرساڭ, قالعان ءۇش كەدەن بەكەتىنە كەزەككە تۇرا المايسىڭ. قاڭتارىلىپ, ايلار بويى كەزەك كۇتەسىڭ, – دەيدى قازاقستاندىق كولىك يەلەرى.
شەتەلدەن تاۋار الىپ كەلەتىن كولىگىمىز كەدەندە ايلاپ كەزەك كۇتىپ, كەپتەلىستە تۇرعان سوڭ, ازىق-تۇلىك پەن ءتۇرلى تاۋارىمىز قىمباتتاماعاندا قايتەدى؟! سوندىقتان «اق جول» پارتياسى توراعاسى ازات پەرۋاشەۆ ارىزدانۋشىلار شاعىمىنا بايلانىستى بۇل ماسەلەنى ءتيىستى ورىندارعا جەتكىزىپ, شەشىلۋ جولىن قاراستىراتىن بولدى.
