قازاقستان رەسپۋبليكاسى بيۋدجەتتىك كودەكسىنىڭ 75, 76-باپتارىنا سايكەس, استانا قالالىق ءماسليحاتىنىڭ تۇراقتى كوميسسيالارى استانا قالاسىنىڭ 2014-2016 جىلدارعا ارنالعان بيۋدجەتىنىڭ جوباسىن تالقىلاۋعا كىرىستى. وسىعان وراي, ا.بايگەنجيننىڭ توراعالىعىمەن ءماسليحاتتىڭ الەۋمەتتىك-مادەني دامىتۋ ماسەلەلەرى جونىندەگى تۇراقتى كوميسسياسىنىڭ وتىرىسى ءوتتى. وندا ەكونوميكا جانە بيۋدجەتتىك جوسپارلاۋ باسقارماسى باسشىسىنىڭ ورىنباسارى گۇلنار ءجۇسىپوۆا بايانداما جاسادى. ودان ءارى دەپۋتاتتار قالالىق مادەنيەت; تۋريزم, سپورت جانە دەنە تاربيەسى; ىشكى ساياسات جانە تىلدەردى دامىتۋ باسقارمالارىنىڭ الداعى ءۇش جىلعا ارنالعان بيۋدجەت جوبالارى مەن ستراتەگيالىق جوسپارلارىن تالقىلادى.
الدىمەن ءسوز العان قالالىق ىشكى ساياسات باسقارماسىنىڭ باسشىسى بولات تىلەپوۆ باعدارلامالار بويىنشا 2014 جىلعا بيۋدجەتتىڭ 500 ميلليونعا كوبەيگەنىن, بۇل ەلوردادا مۋنيتسيپالدىق تەلەارنانىڭ قۇرىلۋىنا بايلانىستى ەكەنىن جەتكىزدى. سەبەبى, بۇگىنگى تاڭدا بۇقارالىق اقپارات قۇرالدارى كوپ جاعدايدا قوعامدىق پىكىر قالىپتاستىرۋدا ايقىنداۋشى فاكتور رەتىندە, ەلدە عانا ەمەس, سونىمەن بىرگە الەمدە ورىن العان وقيعالارعا اسەر ەتە وتىرىپ, مەملەكەت پەن قوعام جۇيەسىندە ماڭىزدى ورىن الادى. سوندىقتان, ءبىزدىڭ قالامىزعا وسىنداي مۋنيتسيپالدىق تەلەارنانىڭ قاجەتتىگى تۋىنداپ وتىرعانىن ايتا كەلە, باسقارما باسشىسى قازىرگى تاڭدا قالالىق قارجى باسقارماسى وسى تەلەارنانى قۇرىپ, ونىڭ ماتەريالدىق نەگىزىن جاساپ جاتقانىن, ال 500 ميلليون تەڭگە تەلەارنانىڭ اقپاراتتىق مازمۇنىنا ارنالاتىنىن, قالعان قاراجات جىلداعى جوبالار بويىنشا جوسپارلانعانىن جەتكىزدى.
استانا قالاسىنداعى تۋريزم, سپورت جانە دەنە تاربيەسى باسقارماسىنىڭ باسشىسى ايتالاپ قورعامباەۆتىڭ ايتۋىنشا, بالالار مەن جاسوسپىرىمدەردىڭ سپورت مەكتەپتەرى مەن سپورت كلۋبتارىنا كەلۋشىلەر قاتارى جىل ساناپ ارتىپ كەلەدى. 2011 جىلى ولاردىڭ سانى 9 952 بولسا, وتكەن جىلى 12 267-ءنى قۇراعان. حالىقارالىق دەڭگەيدەگى جانە قازاقستان رەسپۋبليكاسىنىڭ سپورت شەبەرلەرى اتاعىن يەلەنگەندەر دە كوبەيگەنىمەن, بۇل سالادا ءالى دە بولسا كوپتەگەن سپورت عيماراتتارى تەحنيكالىق جابدىقتالۋى جاعىنان دا, جارىستاردى وتكىزۋ ەرەجەلەرى مەن وقۋ-جاتتىقتىرۋ جۇمىستارىن ۇيىمداستىرۋ بويىنشا دا زامان تالابىنا ساي كەلمەي وتىر. سونداي-اق, استانا تۇرعىندارى سانىنىڭ كۇن ساناپ وسۋىمەن جاتتىقتىرۋشى-وقىتۋشى قۇرامنىڭ, بىلىكتى ماماندار تاپشىلىعى سەزىلە باستادى. باسقارما باسشىسى الداعى ءۇش جىلعا جوسپارلانعان بيۋدجەت جوباسىندا وسى ماسەلەلەردى ەسكەرگەن.
قالالىق مادەنيەت جانە تىلدەردى دامىتۋ باسقارمالارىنىڭ باسشىلارى دا كەلەر جىلدىڭ بيۋدجەتىنە بايلانىستى ءوز ۇسىنىستارىن ءبىلدىردى. حالىق قالاۋلىلارى بولسا اتالمىش باسقارمالار ۇسىنعان بيۋدجەتتىك باعدارلامالار اكىمشىلەرىنىڭ ستراتەگيالىق جوسپارلارىن ماقۇلدادى.
گۇلبارشىن وكەشقىزى
