ۇكىمەت وتىرىسىنان كەيىن «استانا اقشامى» گازەتىنىڭ تىلشىسىنە بەرگەن شاعىن سۇحباتىندا ەنەرگەتيكا ءمينيسترى قانات بوزىمباەۆ وسىلاي مالىمدەدى. ونىڭ ايتۋىنشا, قىزىلوردادان تارتىلاتىن ماگيسترالدىق گاز قۇبىرىنىڭ قۇرىلىسى بيىلعى 1 شىلدەدە باستالسا, 2019 جىلدىڭ سوڭىندا اياقتالادى. ۇكىمەت جيىنىنان كەيىن, ءبىز مينيسترگە ناقتى ەكى-ءۇش ساۋال قويىپ, جاۋابىن الدىق.
– مينيستر مىرزا, ەل ەلەڭدەپ وتىرعان ماگيسترالدىق گاز قۇبىرى قاشان سالىنادى؟ استاناعا گاز ناقتى قاشان كەلەدى؟
– ءبىز ەگەر ماگيسترالدىق گاز قۇبىرىنىڭ قۇرىلىسىن بيىل باستاساق, 2019 جىلدىڭ سوڭىنا دەيىن اياقتايمىز. دەمەك, ول كەزدە استاناعا گاز ەمەس, ماگيسترالدىق قۇبىر عانا جەتەدى. جول كارتاسىندا بايانداعانىمىزداي, ماگيسترالدىق قۇبىر سالىنىپ بىتكەنشە, جەرگىلىكتى اتقارۋشى ورگاندار, اتاپ ايتقاندا, استانا قالاسى مەن قاراعاندى, اقمولا وبلىستارىنىڭ اكىمشىلىكتەرى جەرگىلىكتى گاز تاراتاتىن جەلىلەردى جوبالاۋ جۇمىستارىن ءبىتىرۋى كەرەك. بۇعان جارتى جىل ۋاقىت بەرىلەدى. استاناعا گاز تارتۋدىڭ ءبىرىنشى كەزەڭىندە وسى ماسەلەلەر قاراستىرىلادى. ايتا كەتەيىن, وسى ءبىرىنشى كەزەڭدە استاناداعى ءبىر ىقشام اۋدانعا گاز بەرىلەدى. نەمەسە سۋ قايناتاتىن قوندىرعىلاردى گاز قۇبىرىنا قوسۋ جۇزەگە اسىرىلادى. ال 2019 جىلدىڭ سوڭىندا بۇل جۇمىستار تولىق اياقتالۋى ءتيىس. دەمەك, سول كەزدە استاناعا گاز كەلەدى.
– ال حالىقتىڭ بىلگىسى كەلەتىنى – گازدىڭ باعاسى قانداي بولادى؟ بۇل جەردە مونوپوليا دەگەن بار عوي.
– ءبىزدىڭ قولىمىزدا تەحنيكالىق-ەكونوميكالىق نەگىزدەمە بار. سوعان سايكەس, گازدىڭ باعاسى شامامەن 47 تەڭگە بولۋى مۇمكىن. بۇل – ءبىزدىڭ بولجامىمىز. گازدىڭ باعاسىنا نە نارسە اسەر ەتەدى؟ بىرىنشىدەن, گازدى ورتاشا نارىق باعاسىمەن ساتىپ الامىز. ودان كەيىن ماگيسترالدىق جەلىلەر بويىنشا تاريف بەكىتىلەدى. سودان سوڭ گازدى بولەتىن جەلىلەردىڭ ءتاريفى بولەك ايقىندالادى. وسىدان كەلىپ, بەلگىلى ءبىر باعاسى ناقتىلانادى. ايتا كەتەيىن, جەرگىلىكتى اكىمدىكتەر گاز تارتۋ جۇمىسىن ءۇش نەگىزگى كەزەڭگە ءبولىپ, ىسكە اسىرادى. ال جالپى العاندا «سارىارقا» ماگيسترالدىق گاز قۇبىرىنىڭ قۇنى 267 ملرد تەڭگەنى قۇرايدى.
