كوشەگە رۋداكيدىڭ اتى بەرىلدى
استاناداعى جوبالىق اتاۋى №179-كوشەگە تاجىك-پارسى اقىنى جانە عالىمى ابۋ ابداللاح رۋداكيدىڭ اتى بەرىلدى. قالالىق ءماسليحاتتىڭ كەزەكتەن تىس سەسسياسىندا اتالمىش ۇسىنىستى دەپۋتاتتار ءبىراۋىزدان ماقۇلدادى. سەسسياعا قالا اكىمىنىڭ ورىنباسارى ەرمەك امانشاەۆ قاتىستى.
تىلدەردى دامىتۋ باسقارماسىنىڭ باسشىسى تىلەۋعالي قىشقاشباەۆتىڭ ايتۋىنشا, بۇل ۇسىنىسپەن استانا قالاسىنىڭ اكىمدىگىنە قازاقستان رەسپۋبليكاسىنىڭ سىرتقى ىستەر مينيسترلىگى شىققان. اتالعان ماسەلە 21 اقپاندا وتكەن قالالىق ونوماستيكالىق كوميسسيا وتىرىسىندا قارالىپ, ماقۇلداندى.
«بۇل جاعداي قازاقستان مەن تاجىكستان اراسىنداعى ىنتىماقتاستىقتى ودان ءارى نىعايتۋعا وڭ اسەرىن تيگىزەدى. دۋشانبە قالاسىندا ۇلى ابايدىڭ اتىمەن اتالاتىن كوشە بار. ونىڭ ۇزىندىعى – 2,5 شاقىرىم. كوشە قالانىڭ ورتالىعىندا ورنالاسقان» دەدى باسقارما باسشىسى.
رۋداكيدىڭ اتى بەرىلگەن №179-كوشەنىڭ ۇزىندىعى – 710 مەتر. الماتى اۋدانىندا ورىن تەپكەن بۇل كوشە ب.مايلين كوشەسىنەن باستالىپ, ب.مومىشۇلى داڭعىلىندا اياقتالادى. بۇل كوشەنىڭ بويىندا №51 مەكتەپ-گيمنازيا, №6 قالالىق ەمحانا, تۇرعىن ءۇي كەشەنى مەن كوتتەدج قالاشىعى تۇر.
ابۋ ابداللاح رۋداكي (858-941) – تاجىك كلاسسيكالىق ادەبيەتىنىڭ نەگىزىن سالۋشى, فيلوسوف. زامانىندا «اقىندار اتاسى» اتانعان. شىعارمالارىنىڭ نەگىزگى يدەياسى – ادام ءومىرىن جىرلاۋ. بۇل ءداستۇر وزىنەن كەيىنگى شىعىس ادەبيەتىنە ىقپال ەتتى. رۋداكي ءومىردىڭ ءساندى, سالتاناتتى جاعىن, جاقسىلىقتى, كىرشىكسىز تازا ماحابباتتى ماداقتادى, ادام بويىنداعى اسىل قاسيەتتى جىرلادى. اقىننىڭ شىعارمالارىن زەرتتەۋگە قازاق عالىمدارى تەمىرعالي نۇرتازين, راحمانقۇل بەردىباي ەلەۋلى ۇلەس قوستى. ولەڭدەرىن قاليجان بەكحوجين, عالي ورمانوۆ, تايىر جاروكوۆ, تىلەگەن شوپاشەۆ, قايرات جۇماعاليەۆ اۋدارىپ, كەزىندە رۋداكيدىڭ جىر جيناعى قازاق تىلىندە جەكە كىتاپ بولىپ شىقتى.
امانعالي قالجانوۆ