«نۇر وتان» پارتياسى استانا قالالىق فيليالىنىڭ قولداۋىمەن «كەنەسارى حان ساربازدارى» اتتى كلۋب اشىلدى.
ازىرگە اتالمىش كلۋبتىڭ قىرىقتان استام مۇشەسى بار. استانالىق كەز كەلگەن جاس بۇل كلۋبقا مۇشە بولا الادى. كلۋب جەتەكشىسى, «نۇر وتان» پارتياسى استانا قالالىق فيليالى ساياسي جۇمىس ءبولىمىنىڭ مەڭگەرۋشىسى ەرلان احمەديدىڭ ايتۋىنشا, اتالمىش جوبا «رۋحاني جاڭعىرۋ» باعدارلاماسى اياسىندا قولعا الىندى. ماقساتى – جاستارعا تاريحي دەرەكتەر ارقىلى قازاق ەلىن ازات ەتۋ جولىندا جاۋمەن ارپالىسقان باتىرلارىمىزدىڭ ەرلىگىن جەتكىزۋ, تاريحي تۇلعالار مەن وقيعالارعا دەگەن قۇرمەتتى ارتتىرۋ. كەنەسارىنى قازاق تاۋەلسىزدىگى ءۇشىن كۇرەستىڭ سيمۆولى رەتىندە ناسيحاتتاۋ.
ەل استاناسى الاتاۋ باۋرايىنان ارقاعا كوشكەندە ەسىلدىڭ بويىندا العاشقىلاردىڭ ءبىرى بولىپ كەنەسارى حاننىڭ ەسكەرتكىشى بوي كوتەردى. بۇل تەگىن ەمەس. 1838 جىلدىڭ تامىز ايىندا كەنەسارى وتارشىلدىققا قارسى شىعىپ, اقمولا بەكىنىسىنە شابۋىل جاسادى. سول كوتەرىلىستە 250 ساربازى قازا بولدى. بۇگىندەرى ولار قالا ىشىندەگى «قاراوتكەل» زيراتىندا جاتىر.
«جوبانى باستار الدىندا تاريحشىلارمەن كەڭەسىپ, جوسپارىمىزدى كورسەتىپ, اقىلداستىق. بولاشاقتا كەنەسارى حاننىڭ ومىرىنە ارنالعان وتىرىستار, دوڭگەلەك ۇستەل مەن عىلىمي كونفەرەنتسيالار وتكىزۋدى جوسپارلاپ وتىرمىز» دەيدى ەرلان احمەدي.
كلۋبتىڭ اشىلۋ راسىمىنەن كەيىن كلۋب مۇشەلەرى «قاراوتكەل» زيراتىنا بارىپ, كەنەسارى ساربازدارىنىڭ رۋحىنا قۇران باعىشتاپ, سەنبىلىك وتكىزدى.
