ەلوردا اكىمدىگىندە كەزەكتى اكىم اپپارات جيىنى ءوتتى. وندا قالا باسشىسىنىڭ ورىنباسارلارى وزدەرىنىڭ جاۋاپتى سالالارى بويىنشا قىسقاشا شولۋ جاسادى.
الدىمەن شاھار اكىمىنىڭ ءبىرىنشى ورىنباسارى سەرگەي حوروشۋن قالاداعى تۇرعىن ءۇي قۇرىلىسىنداعى ۇلەسكەرلەردىڭ ماسەلەلەرى بويىنشا ءسوز الدى.
« وتكەن اپتادا وسى ماسەلەگە بايلانىستى وتىرىستا 24 نىسان قارالدى. سوندىقتان «نۇرلى جەر» باعدارلاماسى اياسىندا جۇمىس جۇرگىزۋ مەحانيزمدەرىن تۇرعىن ءۇي قۇرىلىس كووپەراتيۆتەرىمەن بىرلەسىپ قولعا الدىق» دەدى س.حوروشۋن.
ودان كەيىن قوسمان ايتمۇحامەتوۆ قالانىڭ ءتوتەنشە جاعدايدىڭ الدىن الۋ, سانيتارلىق-ەپيدەميولوگيالىق احۋال جانە جىلىتۋ ماۋسىمىنىڭ قالىپتى جاعدايى تۋرالى باياندادى. اكىم ورىنباسارى ەرمەك امانشاەۆ دەنساۋلىق سالاسى تۋرالى, ونى ىشىندە ءدارى-دارمەكتەر مەن ولاردىڭ قاجەتتى قورى جايىندا سويلەدى. ماليكا بەكتۇروۆا جانار-جاعار ماي مەن كومىر نارىعى تۋرالى ايتتى. ول ءوز سوزىندە بۇگىندە ەلوردادا كومىر نارىعى تۇراقتى باقىلاۋدا ەكەندىگىن جەتكىزدى.
قالالىق ىشكى ىستەر دەپارتامەنتىنىڭ باستىعى مارات قوجاەۆ باس شاھارداعى قۇقىقتىق ءتارتىپتى قامتاماسىز ەتۋ بويىنشا قابىلدانعان شارالارعا توقتالدى. « استانادا قۇقىقتىق جاعداي ورنىقتى. وتكەن اپتادا 659 قىلمىس تىركەلدى. بۇل وتكەن جىلدىڭ وسى كەزەڭىمەن سالىستىرعاندا 305 وقيعاعا از» دەدى ول.
«بۇگىن ءبىز 2018-2019 جىلدارعا ارنالعان ەلوردادا قىلمىستىڭ الدىن الۋدىڭ كەشەندى جوسپارىن قابىلدادىق. ونىڭ ماقساتى – قالاداعى قىلمىستىق احۋالدى جاقسارتۋ» دەدى استانا اكىمى اسەت يسەكەشەۆ. ونىڭ ايتۋىنشا, كەشەندى جوسپار ەلوردا اكىمدىگى, ىشكى ىستەر دەپارتامەنتى جانە قالالىق پروكۋراتۋرامەن بىرلەسىپ ازىرلەنگەن.
سوعان بايلانىستى ەلوردا باسشىسى قالالىق اكىم اپپاراتىنا وسى جوسپاردىڭ ورىندالۋىن باقىلاۋدى تاپسىردى. «استانا LRT» جشس-نىڭ توراعاسى بەكمىرزا يگەنبەردينوۆ قوعامدىق كولىكتىڭ جاعدايىنا شولۋ جاسادى. قالانى اباتتاندىرۋ جۇمىستارى بويىنشا الماتى, ەسىل, سارىارقا اۋداندارىنىڭ اكىمدەرى ەسەپ بەردى.
