پروكۋراتۋرا ورگاندارى ءوز قىزمەتىندە ازاماتتاردىڭ زاڭدى قۇقىلارى مەن مۇددەلەرىنىڭ قورعالۋىن قانشالىقتى قامتاماسىز ەتۋدە؟ مەملەكەت باسشىسىنىڭ «قازاقستان الەمدە ادامدار ءۇشىن قاۋىپسىز جانە تۇرۋعا جايلى ەلدىڭ بىرىنە اينالۋى ءتيىس» دەگەن تاپسىرماسى قالاي ورىندالۋدا؟ قىلمىستىق ءىستى جۇرگىزۋدىڭ سوتقا دەيىنگى ساتىسىن قاداعالاۋدا وزگەرىس بار ما؟ وسى جانە باسقا دا ماسەلەلەر تۋرالى ورتالىق كوممۋنيكاتسيالار الاڭىندا وتكەن بريفينگتە باس پروكۋروردىڭ ورىنباسارى نۇرمۇحانبەت يساەۆ ايتىپ بەردى.
ونىڭ ايتۋىنشا, پروكۋراتۋرا قىزمەتىندەگى ەڭ وزەكتى ماسەلە – قىلمىستىق ءىس جۇرگىزۋدىڭ سوتقا دەيىنگى ساتىسىنىڭ زاڭدىلىعىن قاداعالاۋعا تۇبەگەيلى وزگەرىس ەنگىزۋ. وسىعان بايلانىستى جەرگىلىكتى جەرلەردە قاداعالاۋ مىندەتتەرىن كۇشەيتە وتىرىپ, پروكۋرورلاردى جاڭا «قىلمىستىق ءىس جۇرگىزۋ كودەكسىنىڭ» اياسىندا جۇمىس ىستەۋگە دايىندىق جۇرگىزىلۋدە.
«قىلمىستاردى تىركەۋدى تارتىپكە كەلتىرۋ بويىنشا اسا اۋقىمدى جۇمىستار جۇزەگە اسىرىلدى. قازىرگى كەزدە قىلمىستىق احۋالعا شىنايى باعا بەرە الامىز. بۇل – پرەزيدەنت اكىمشىلىگىنىڭ بەيىندى ءبولىمى مەن قاۋىپسىزدىك كەڭەسىنىڭ قولداۋى ارقاسىندا جۇرگىزىلگەن ءۇش جىلدىق جۇمىستىڭ ناتيجەسى. سونىڭ ارقاسىندا قىلمىستىق احۋالدى شىنايى بىلە الاتىن بولدىق. دەگەنمەن, كريمينوگەندىك جاعدايدىڭ تىم ناشارلاماعانىن دا ايتا كەتكەن ءجون» دەيدى ن. يساەۆ.
بۇگىندە ەلىمىزدە اسا اۋىر قىلمىس تۇرلەرىنە جاتاتىن كىسى ءولتىرۋ, توناۋ مەن قاراقشىلىق ەداۋىر ازايعان. قىلمىستىڭ تۇگەل تىركەلۋىن قامتاماسىز ەتۋ ماقساتىنداعى جۇمىستار ءوز ناتيجەسىن بەرۋدە. ياعني, ورگاندار قىلمىستى تىركەۋ ماسەلەسىنە قاتىستى شەشىمدەردى جەدەل قابىلداۋعا قول جەتكىزگەن.
– قازىرگى ۋاقىتتا ءجۇز ارىزدانۋشىنىڭ توقسانى ءۇش كۇن ىشىندە وزدەرىنىڭ شاعىمدارى بويىنشا قانداي شەشىم قابىلدانعانىن بىلە الادى. سونىمەن قاتار, قىلمىستىق پروتسەسس بارىسىندا ازاماتتاردىڭ كونستيتۋتسيالىق قۇقىن قورعاۋ – وسى سالاداعى قاداعالاۋدىڭ باستى باعىتى. وسى رەتتە كەزەكشى پروكۋرورلار ينستيتۋتىن ەنگىزۋ شارالارى ناتيجەسىندە ازاماتتاردى نەگىزسىز ۇستاۋ, زاڭسىز ءتىنتۋ بارىنشا ازايدى. ءبىزدىڭ ماقسات – زاڭسىزدىقتاردى مۇلدەم بولدىرماۋ, – دەيدى باس پروكۋروردىڭ ورىنباسارى.
ەستەرىڭىزدە بولسا, بىلتىر قاراشا ايىندا باس پروكۋرور تۇتقىنداۋعا بالاما رەتىندە كەپىلدىكتى كەڭىنەن قولدانۋ تۋرالى نۇسقاۋ بەرگەن. بۇل ءبىزدىڭ ەلدە قولدانىلماعان, بىراق, الەمدە بار تاجىريبە. ەگەر وتكەن جىلى جيىرما رەت قانا كەپىلدىك بەرىلسە, سوڭعى ءتورت ايدا بۇل 875 ادامعا قولدانىلىپتى. دەسەك تە, قىلمىستىق ءىس جۇرگىزۋدىڭ سوتقا دەيىنگى ساتىسىنىڭ زاڭدىلىعىن قاداعالاۋ سالاسىندا شەشىمىن تاپپاعان ماسەلە ءالى دە كوپ.
