كەشە ورتالىق سايلاۋ كوميسسياسى سەنات سايلاۋىنىڭ الدىن-الا قورىتىندىلارىن جاريالادى. ءسويتىپ ەلىمىزدىڭ 17 وڭىرىنەن سايلاناتىن دەپۋتاتتاردىڭ اتى-ءجونى بەلگىلى بولدى. سايلاۋدىڭ سوڭعى ناتيجەسى 18 تامىزدا جاريالانادى.
سەنات دەپۋتاتتارى جاڭا سايلاۋ قۇقىعى نەگىزىندە تاڭدالدى. وعان سايكەس, ۇمىتكەرلەرگە وبلىستىق, اۋداندىق جانە قالالىق ءماسليحات دەپۋتاتتارى داۋىس بەرەدى. داۋىس بەرەتىن بارلىق 3 071 ءماسليحات دەپۋتاتتارىنىڭ 2 892-ءسى تىركەلىپ, سەنات دەپۋتاتتارىن سايلادى. سەنات سايلاۋىنا 46 ۇمىتكەر قاتىستى. ولاردىڭ ىشىنەن تەك 17 ادام عانا جوعارى پالاتاعا وتە الادى. كەشەگى سايلاۋدا 185 باقىلاۋشى بولدى. ولاردىڭ ىشىندە 180 ادام قازاقستاندىق باقىلاۋشىلار بولسا, تۇركى تىلدەس مەملەكەتتەرىنىڭ ىنتىماقتاستىعى كەڭەسىنىڭ ميسسياسىنان بەس باقىلاۋشى كەلدى.
ورتالىق سايلاۋ كوميسسياسى الدىن-الا مالىمەتىنە سايكەس, سەنات سايلاۋىندا تومەندەگى ۇمىتكەرلەر جەڭىسكە جەتتى: اقمولا وبلىسىنان – اقمولا وبلىسى بويىنشا رەۆيزيالىق كوميسسيانىڭ توراعاسى نۇرلان بەكەنوۆ – 89.5%; اقتوبە وبلىسىنان – شالقار اۋدانىنىڭ اكىمى باۋىرجان قانيەۆ – 89%; اتىراۋ وبلىسىنان – «كازاحستان پەتروكەميكال ينداستريز ينك.» جشس باسقارۋشى ديرەكتورى (KPI Inc) ساعىندىق لۇقپانوۆ – 82.69%; باتىس قازاقستان وبلىسىنان – ىسكەر ايەلدەر قاۋىمداستىعىنىڭ ايماقتىق باسشىسى ءلاززات رىسبەكوۆا – 70.33%; جامبىل وبلىسىنان – جامبىل وبلىسى اكىمىنىڭ ءبىرىنشى ورىنباسارى بەكبولات ورىنبەكوۆ – 92.09%; قوستاناي وبلىسىنان – قوستاناي وبلىسى اكىمىنىڭ ورىنباسارى سەرگەي كارپليۋك – 87.21%; قىزىلوردا وبلىسىنان – Nur Otan پارتياسىنىڭ قىزىلوردا وبلىستىق فيليالى توراعاسىنىڭ ءبىرىنشى ورىنباسارى اقمارال ءالنازاروۆا – 77.86%; ماڭعىستاۋ وبلىسىنان – «قاراجانباسمۇناي» اق ءبىرىنشى ۆيتسە-پرەزيدەنتى سۇيىندىك الداشەۆ – 87%; پاۆلودار وبلىسىنان – پاۆلودار مەملەكەتتىك پەداگوگيكالىق ۋنيۆەرسيتەتىنىڭ رەكتورى التىنبەك نۋحۇلى – 81.97%; سولتۇستىك قازاقستان وبلىسىنان – قازىرگى سەناتور ولگا پەرەپەچينا – 87.57%; تۇركىستان وبلىسىنان – قازىرگى سەناتور ءالي بەكتاەۆ – 91.53%; شىعىس قازاقستان وبلىسىنان – بورودۋليحا اۋدانىنىڭ اكىمى ولگا بۋلاۆكينا – 93.07%; الماتى وبلىسىنان – الماتى وبلىستىق ءماسليحاتىنىڭ حاتشىسى سۇلتان ديۋسەمبينوۆ – 92.63%; قاراعاندى وبلىسىنان – قازىرگى سەناتور سەرگەي ەرشوۆ – 83.15%; نۇر-سۇلتاننان – ساكەن سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ رەكتورى اقىلبەك كۇرىشباەۆ – 75%; الماتىدان – مەدەۋ اۋدانىنىڭ اكىمى سۇلتانبەك ماكەجانوۆ – 100%; شىمكەنتتەن قازىرگى سەناتور ايگۇل قاپباروۆا 72% داۋىس جينادى.
