«قازاقستان» ورتالىق كونتسەرت زالىندا ءداستۇرلى XV ەۋرازيا فەستيۆالىنىڭ شىمىلدىعى ءتۇرىلدى.
بيىلعى بايقاۋدى مەرەيتويلىق دەپ ايتۋعا بولادى. ون بەسىنشى رەت ءوتىپ وتىرعان مادەني شاراعا شەتەلدىك قوناقتاردان تانىمال تۇرىك اكتەرى بۋراك وزچيۆيت, رەسەيلىك كينو جانە تەاتر ارتىستەرى دميتري ديۋجەۆ, ناتاليا انتونوۆا, انتون ماكارسكي كەلدى. سونداي-اق قازاق جەرىنە امەريكالىق پروديۋسەرلەر دە ات باسىن تىرەدى. ال قازاقستاندىق كينو جۇلدىزدارىنان جان بايجانباەۆ, جاننا قۋانىشەۆا, فارحات ءابدىرايىموۆ, سانجار ماديەۆ, قارلىعاش مۇحامەدجانوۆا, اسەل ساعاتوۆا, اسىلحان تولەپوۆ سەكىلدى تەلەەكران ارقىلى بەينەلەرى وزىمىزگە جاقسى تانىس اكتەرلەر بار. ايتۋلى شارانىڭ اشىلۋىندا مادەنيەت جانە سپورت ءمينيسترى اقتوتى رايىمقۇلوۆا بۇل فەستيۆالدىڭ وتاندىق كينونىڭ جاڭا قارقىنمەن دامۋىنا ىقپال ەتەتىن الاڭ ەكەندىگىن ايتىپ, قاتىسۋشىلارعا ساتتىلىك تىلەدى.
وسى جىلعى باعدارلامادان وتاندىق كينوعا كوپ كوڭىل ءبولىنىپ وتىرعاندىعىن بايقادىق. فەستيۆالدىڭ اتقارۋشى ديرەكتورى قانات تورەبايدىڭ ايتۋىنشا, بايقاۋدىڭ «ەۋرازيا جۇرەگىندە» اتتى ارنايى بولىمىندە ەلىمىزدە سوڭعى جىلدارى تۇسىرىلگەن 12 فيلم كورسەتىلەدى ەكەن.
– جالپى, فەستيۆالگە 30 ەلدەن 30-دان استام تۋىندى قاتىسىپ وتىر. ولاردى شەتەلدىك جانە وتاندىق كينو سالاسىنىڭ ۇزدىك ماماندارى سارالايدى. بيىل باسىمدىقتى قىسقامەتراجدى فيلمدەر مەن انيماتسيالىق تۋىندىلارعا بەرىپ وتىرمىز, – دەدى ول.
سونىمەن, التى كۇنگە سوزىلاتىن شارا اياسىندا كورەرمەندەرگە شەتەلدىك جانە ءوزىمىزدىڭ كينولاردى كورۋگە تاماشا مۇمكىندىك تۋىپ وتىر. فەستيۆالدىڭ شىمىلدىعى 6 شىلدە كۇنى جابىلادى.
