كىسى اقىسىن جەگەندەر جاۋاپقا تارتىلادى

استانا قالاسىندا جۇمىسشىلارعا جالاقى تولەۋگە قاتىستى بىرقاتار پروبلەمانىڭ الدىن الۋ جانە ونى شەشۋ ماقساتىندا ارنايى جۇمىس توبى قۇرىلدى.

ەلوردا اكىمدىگىندە سەرگەي حوروشۋننىڭ توراعالىعىمەن اتالمىش توپتىڭ العاشقى وتىرىسى ءوتتى. وعان ەلوردا پروكۋراتۋراسىنىڭ وكىلدەرى, جۇمىس بەرۋشىلەر قاتىستى. كۇن تارتىبىندەگى باستى ماسەلە – ەڭبەكاقىنى كەشىكتىرىپ تولەۋ جاعدايىن جانە قارىزداردى بولدىرماۋ.

قالا پروكۋراتۋراسىنىڭ تالابى بويىنشا ەڭبەك ينسپەكتورلارى تەكسەرۋ جۇمىستارىن جۇرگىزدى. بۇل شارالاردىڭ قورىتىندىسى بويىنشا 5 كومپانيادا – «World Monitoring» جشس, «Alumko Aden Metal FZCO» كومپانياسىنىڭ فيليالى, «NUR Kutkarushy» جشس, Elvit KZ» جشس, «نيكاسترويسەرۆيس» جشس جالاقىنى تولەمەۋ جانە ونى كەشىكتىرىپ تولەۋ وقيعالارى انىقتالدى.

استانا قالاسى پروكۋراتۋراسىنىڭ قاداعالاۋ اكتىسى بويىنشا جوعارىدا كورسەتىلگەن كاسىپورىنداردىڭ زاڭدى تۇلعالارى قر اكىمشىلىك قۇقىق بۇزۋشىلىقتار كودەكسىنىڭ 87-بابىنا (جالاقى تولەۋ تالاپتارىن بۇزۋ) سايكەس اكىمشىلىك جاۋاپكەرشىلىككە تارتىلدى. ولارعا, جالپى العاندا, 400 اەك – 962000 تەڭگە كولەمىندە ايىپپۇل سالىندى.

ينسپەكتورلار ەڭبەك زاڭناماسىن بۇزۋدىڭ ءار وقيعاسى بويىنشا ۇيعارىمدار شىعاردى.

جيىندا «التىن 2008» جشس پەن «Alumko Aden Metal FZCO» كومپانياسىنىڭ فيليالى وكىلدەرى ءوز جۇمىسكەرلەرى الدىنداعى قارىزدى وتەۋ جونىندە ەسەپ بەردى.