كىتاپحانا شەرۋى

كەشە «كەرۋەن» ساۋدا جانە ويىن-ساۋىق ورتالىعىندا ورتالىقتاندىرىلعان كىتاپحانالار جۇيەسىنىڭ ۇيىمداستىرۋىمەن «كىتاپحانا شەرۋى» اتتى فەستيۆال باستالدى. بۇل مادەني شارا ءۇش كۇنگە جالعاسادى.فەستيۆالدىڭ ماقساتى – جاستاردى, جالپى جۇرتشىلىقتى كىتاپ وقۋعا, قادىرلەۋگە دارىپتەۋدى كوزدەيدى.
مادەني شارا اياسىندا اۋقىمدى كىتاپ كورمەسى ۇيىمداستىرىلدى. وعان 500 كىتاپ قويىلدى. بۇل جاي عانا كورمە ەمەس, ول كىتاپتاردى وقۋعا نەمەسە ۇيگە الۋعا بولادى. مىسالى, تاڭەرتەڭنەن تۇسكە دە­يىن كىتاپ الىپ وقىعان وقىرمان سانى 185-كە جەتكەن. سونداي-اق حاكىم اتامىزدىڭ 175 جىلدىق مەرەيتويىنا وراي «اباي وقۋلارى» بولدى. بۇل بايقاۋعا قاتىسۋعا ەشقانداي شەك قويىلعان جوق. مەكتەپ وقۋشىسىنان باستاپ, ەرەسەكتەرگە دەيىن اقىن ولەڭدەرى مەن قارا سوزدەرىن وقىپ, جيىلعان قاۋىمعا رۋحاني ءلاززات سىيلادى. «اباي وقۋلارى» سەنبى كۇنى دە جالعاسىن تابادى. ال بۇگىن ساكەن سەيفۋللينىڭ 125 جىلدىعىنا وراي «ساكەن وقۋلارى» وتەدى. سونىمەن قاتار فەستيۆال اياسىندا مەملەكەتتىك سىيلىقتىڭ لاۋرەاتى نەسىپبەك ايتۇلى, نۇرلان قالقا, ەلدوس توقتارباي سەكىلدى اقىن-جازۋشىلارمەن وقىرمانداردىڭ كەزدەسۋى بولماق.
«بيىل ءبىزدىڭ ورتالىقتاندىرىلعان كىتاپحانالار جۇيەسىنىڭ قۇرىلعانىنا 45 جىل تولىپ وتىر. قازىر ورتالىققا 18 كىتاپحانا قارايدى. جىل ساناپ وقىر­ماندار سانى كوبەيىپ كەلەدى. اسىرەسە, جەتكىنشەكتەردىڭ كىتاپقا قىزىعۋشىلىعى قۋانتادى. ال بۇگىنگى شارا دا سول وقىرماندارىمىزعا ارنالىپ وتىر. فەستيۆال ءوتىپ جاتقان جەردى ايماقتارعا ءبولىپ قويدىق. ماسەلەن, بالالارعا ارناپ ەرتەگى ءبولىمى, وقىرماندار زالى جۇمىس ىستەيدى. سونىمەن بىرگە شەرۋگە «اباي» جانە «فوليانت» كىتاپ دۇكەندەرى قولداۋ كورسەتىپ وتىر. قىسقاسى, تۇرعىندارعا كىتاپ مەرەكەسىنە كەلىڭىز دەپ ايتقىم كەلەدى» دەدى ورتالىقتاندىرىلعان كىتاپحانالار جۇيەسى ديرەكتورىنىڭ ورىنباسارى گۇلميرا ايداربەكقىزى.