پرەزيدەنتتىككە كانديدات قاراقات ابدەن كەندى ولكە قاراعاندىدا كوپبالالى انالارمەن كەزدەستى.
الدىمەن جينالعانداردى سايلاۋالدى باعدارلاماسىنىڭ نەگىزگى باعىتتارىمەن تانىستىرعان كانديدات كەزدەسۋ بارىسىندا قاتىسۋشىلار كوتەرگەن تۇيتكىلدى ماسەلەلەرگە جاۋاپ بەردى.
«شاڭىراق» كوپبالالى وتباسىلاردى قولداۋ ورتالىعى زاڭگەرلىك, پسيحولوگيالىق جانە الەۋمەتتىك باعىتتا كومەك كورسەتەدى. مۇندا ايەلدەردى جۇمىسقا ورنالاستىرۋ بويىنشا قولداۋ تەتىكتەرى بار. جەكە كاسىپ اشۋ ءۇشىن بيزنەس-جوسپار ازىرلەۋگە جانە تۇرعىن ءۇي باعدارلامالارىنا قاتىسۋعا جاردەمدەسەدى.
كانديداتتىڭ وبلىستاعى وڭىرلىك شتابى دا كەستەگە ساي جۇمىس ىستەپ جاتىر.
قاراقات ابدەننىڭ قاراعاندى وبلىسى بويىنشا سەنىمدى وكىلى شولپان ءابىلدينانىڭ ايتۋىنشا, وسى وبلىستاعى جەتى اۋدان مەن التى قالادا سايلاۋ نۇكتەلەرى جانە پۋنكتتەرى ورنالاسقان.
– ءار اۋدان, قالالاردان ءبىز ەرىكتىلەردى جيناپ الدىق. سولار ارقىلى كانديداتتىڭ باعدارلاماسىن ءارى قاراي تاراتامىز, – دەدى ش.ءابىلدينا.
كانديداتپەن كەزدەسۋگە كەلگەن كوپبالالى انالاردىڭ ءبىرى – ساندۋعاش قۇلماقوۆا. ول قوعام بەلسەندىسىمەن جاقىنىراق تانىسقانىنا قۋانىشىن جاسىرا المادى.
– كانديداتپەن بەتپە-بەت تانىستىق. پىكىرتالاس جاساپ, ۇسىنىستارىمىزدى ايتتىق. پرەزيدەنتتىككە كانديدات قاراقات ابدەن بولسا ءوزىنىڭ باعدارلاماسىمەن ءبولىستى, – دەدى كوپبالالى انا.
