قر پرەزيدەنتتىگىنە كانديدات سالتانات تۇرسىنبەكوۆا جانۋارلارعا قامقورلىق جاسايتىن ورتالىققا باردى.
ۇمىتكەر جۇمىسشىلارمەن جانە ورتالىق يەسىمەن قازاقستانداعى پاناسىز جانۋارلاردىڭ قيىندىقتارى جانە ولارعا قانداي كومەك قاجەت ەكەندىگى تۋرالى اڭگىمەلەستى.
ەلىمىزدە جانۋارلارعا قاتىستى قورقىنىشتى جاعدايلار وتە كوپ ورىن الادى. قازاقستاندىقتار ءۇي جانۋارلارىنا ادامدار تاراپىنان جاسالاتىن قورلىق تۋرالى كۇندەلىكتى جاڭالىقتاردان ءجيى وقيدى. جانۋارلاردىڭ قۇقىعىن قورعايتىن ەرىكتىلەر يەسىز جانۋارلارعا كومەك كورسەتۋ ماقساتىندا وسىنداي ورتالىقتار اشقان.
ەلورداداعى «پەرىشتە جۇرەگى» جانۋارلارعا قامقورلىق ورتالىعىندا 130 يت پەن 20 مىسىق ءومىر سۇرەدى. مەكەمەنىڭ قۇرىلعانىنا بيىل ءتورت جىل بولادى. ورتالىقتىڭ نەگىزىن قالاۋشى گۇلميرا نازارحانوۆا قازاقستاندا جانۋارلارعا ارنالعان مەملەكەتتىك باسپانالاردىڭ جوعىن, تەك اۋلاۋ قىزمەتتەرى مەن جانۋارلاردى ۋاقىتشا ۇستاۋ ورتالىقتارى بار ەكەنىن اتاپ ءوتتى. جانۋارلار قۇقىعىن قورعاۋشىنىڭ ايتۋىنشا, بۇل ماقساتقا بولىنگەن قاراجاتتى تيىمدىرەك جۇمساۋعا بولار ەدى. ونىڭ ۇستىنە, ءولتىرۋ ءۇشىن قولدانىلاتىن ادىستەر قاتىگەزدىككە جاتادى جانە جانۋارلارعا قارىم-قاتىناسى ادامگەرشىلىككە نەگىزدەلگەن دامىعان ەلدەردىڭ ستاندارتتارىنا سايكەس كەلمەيدى.
سالتانات تۇرسىنبەكوۆا ەلوردادا كوپبالالى انالارمەن كەزدەستى. كوپبالالى وتباسىلاردىڭ ماسەلەلەرى بارىنە بەلگىلى: قيىن قارجىلىق جاعداي, باسپانا ماسەلەسى جانە بالالاردى وقىتۋدى ۇيىمداستىرۋ, قارىز جۇكتەمەسى. ايەلدەر سالتانات تۇرسىنبەكوۆاعا وزدەرىن مازالاعان سۇراقتارىن قويدى. قۇقىق قورعاۋشى ءوزىنىڭ سايلاۋالدى باعدارلاماسى اياسىندا ەلدەگى جاعدايدى وزگەرتكىسى كەلەتىنىن ايتتى. ماسەلەن, كانديدات كوپبالالى جانە قيىن ومىرلىك جاعدايداعى وتباسىلاردىڭ قارىزدارىن ەسەپتەن شىعارىپ, ايەلدەردىڭ زەينەت جاسىن 58 جاسقا دەيىن تومەندەتۋدى, ەڭ تومەنگى جالاقى مەن ەڭ تومەنگى كۇنكورىس دەڭگەيىن (زەينەتاقى جيناقتارى, جاردەماقىلار مەن شاكىرتاقىلار) ارتتىرۋدى, باعدارلاما ازىرلەۋدى ۇسىنادى. كەدەيشىلىكپەن كۇرەسۋ, ۇەۇ مەن ەرىكتىلەردى تارتا وتىرىپ, قولجەتىمدى باعاداعى ونىمدەر مەن تاۋارلارى بار الەۋمەتتىك دۇكەندەر جەلىسىن قۇرۋ جانە ت. ب. جوسپارلارى دا بار.
