– پرەزيدەنت قاسىم-جومارت توقاەۆ «Egemen Qazaqstan» گازەتىندە جاريالانعان سۇحباتىندا ۇلت مۇددەسى مەن ەكونوميكالىق دامۋدا ديپلوماتيانىڭ ماڭىزدىلىعىنا باسا نازار اۋداردى. ءبىز وزىق ويلى ۇلت رەتىندە تەك العا قاراۋىمىز كەرەك! بۇل داۋىردە قازاق ءۇشىن ديپلوماتيادان باسقا جول بار ما؟ پرەزيدەنتىمىز قاسىم-جومارت توقاەۆ قازاقستاننىڭ گەوساياسي جاعدايىن ەسكەرە وتىرىپ, كوپۆەكتورلى سىرتقى ساياساتتى ۇستانۋ كەرەكتىگىن ايتتى. سوندىقتان قازاقستان رەسپۋبليكاسى سىرتقى ساياساتتا كوپۆەكتورلى باعىتتى ۇستانادى. بۇل بەيبىتشىلىك, تەپە-تەڭدىك جانە پراگماتيكانى سيپاتتايدى.
سوناۋ ورتالىق ازيا تاريحىنداعى ماڭىزدى ساۋدا جانە مادەني جولدى بىلدىرەتىن ۇلى جىبەك جولى – حالىقارالىق قاتىناستىڭ ءوزارا ءتيىمدى بولاتىندىعىنىڭ ايقىن دالەلى. ۇلى جىبەك جولى ءارتۇرلى وركەنيەتتەردى بايلانىستىراتىن جانە تاۋارلار, يدەيالار مەن مادەنيەت الماسۋعا مۇمكىندىك بەرەتىن سىرتقى حالىقارالىق قاتىناستاردىڭ نەگىزگى ەلەمەنتى بولدى. بيىل ەلىمىزدە بىرقاتار جاھاندىق سامميتتەر مەن فورۋمدار وتەدى. قازاقستان بىرنەشە حالىقارالىق ۇيىمدارعا توراعالىق ەتەدى. ەگەر ۇلى جىبەك جولى مادەنيەت پەن ساۋدانى دامىتسا, بۇل ۇيىمدار ءوزارا كومەك پەن قولداۋ كورسەتۋگە باعىتتالعان جانە ءبىز ابىرويمەن قىزمەتىمىزدى اتقارىپ كەلە جاتقانىمىزعا سەنىمدىمىز.
پرەزيدەنتىمىز قاسىم-جومارت توقاەۆ ايتقانداي, ەلىمىزدىڭ كۇشى – بىرلىكتە, پاراساتتىلىق پەن توزىمدىلىكتە. «الىستاعى اعايىننان, جاقىنداعى كورشىڭ ارتىق» دەگەن قازاقتىڭ قارا سوزىندە ايتىلعانداي, سىرتقى ساياساتتىڭ بەرىكتىگى ماقساتىندا قازاقستان كورشى ەلدەرمەن قارىم-قاتىناسىن نىعايتا بەرمەكشى. بۇگىنگى تاڭدا قازاقستان مەن قىتاي اراسىنداعى قارىم-قاتىناس دوستىق, تاتۋ كورشىلىك جانە ماڭگىلىك ستراتەگيالىق ارىپتەستىك رۋحىندا بەلسەندى دامىپ كەلەدى. ال رەسەي – قازاقستاننىڭ باستى ستراتەگيالىق ارىپتەسى ءارى وداقتاسى. 20 ميلليون قازاقستاندىقتى قول ۇستاتىپ شەكارا شەبىنە قويساق, ادام سانى جەتپەسى انىق. وسى اتالارىمىزدان قالعان امانات جەر, دۇنيەدە 9-ورىندى يەلەنگەن ۇلان-عايىر اتىراپتى ساقتاپ قالىپ, ۇلت مۇددەسىنە جۇمىس ىستەۋ ءۇشىن ەلدىڭ ەكونوميكاسىن ءارى قاراي دامىتۋعا سىرتقى ساياساتتا ديپلوماتيالىق, دوستىق, ەكونوميكالىق مۇددەلىلىكتى ساقتاۋ ارقاسىندا عانا جەتۋىمىز ءسوزسىز.
ولجاس قۇسپەكوۆ,
ماجىلىس دەپۋتاتى
