كوگىمىزدە كوك تۋ جەلبىرەگەن كۇن
قازاقستان رەسپۋبليكاسىنىڭ مەملەكەتتىك رامىزدەر كۇنىنە وراي, ەلوردالىق جاستار «مەنىڭ قازاقستانىم – مەنىڭ استانام» اتتى مەرەكەلىك اكتسيا وتكىزدى.
وسىمەن ءتورتىنشى رەت وتكەن بۇل بۇقارالىق شارا «ماڭگىلىك ەل» سالتانات قاقپاسىنىڭ الدىنان ساپ تۇزەگەن «مەنىڭ تۋىم» اتتى اۆتوشەرۋمەن باستالدى. اۆتوكەرۋەن مەملەكەتتىك رامىزدەرىمىزدىڭ سالتانات قۇرعان جىلدار سانىن بىلدىرەتىن 23 كولىكتەن جاساقتالدى. ولاردىڭ ءبارى – ەلىمىزدە قۇراستىرىلعان «CHEVROLET CRUZE» ماركالى اۆتوكولىكتەر. قالانىڭ باستى كوشەلەرىن ارالاپ كەلگەن شەرۋ ەسىل وزەنىنىڭ جاعاسىنا ايالدادى. لوندون وليمپياداسىنىڭ چەمپيونى سەرىك ساپيەۆ (سۋرەتتە) مەملەكەتتىك تۋدى سالتاناتتى جاعدايدا كاتەرلەرگە ءمىنىپ كەلگەن «جاستار» قۇرىلىس وتريادتارىنىڭ مۇشەلەرىنە تابىس ەتتى. ولار مەملەكەتتىك تۋىمىزدى سامال جەلمەن جەلبىرەتىپ, ەسىل وزەنىنىڭ بويىمەن الىپ ءوتتى.
ودان كەيىن جاستار كوك بايراعىمىزدى سيدنەي وليمپياداسىنىڭ چەمپيونى ولگا شيشيگيناعا تابىس ەتتى. پاتريوتتار كەرۋەنى ورتالىق ساياباقتى بەتكە الىپ, كوك بايراقتى وسىندا قادادى. مۇنان كەيىن ەلىمىزدىڭ ءانۇرانى شىرقالىپ, مەرەكەلىك شاراعا ارنالعان سالتاناتتى ميتينگ باستالدى.
– بۇگىنگى مەرەكە قازاقستان ءۇشىن ماڭىزدى كۇندەردىڭ ءبىرى دەپ ەسەپتەيمىن. ويتكەنى, وسىدان 23 جىل بۇرىن ناق وسى كۇنى تاۋەلسىز ەلىمىزدىڭ مەملەكەتتىك رامىزدەرى العاش رەت كوتەرىلگەن
بولاتىن. ءاربىر حالىق ءۇشىن مەملەكەت رامىزدەر كيەلى بولىپ ەسەپتەلەدى. ەستەرىڭىزگە الىڭىزدارشى, وليمپيادا جەڭىستەرىندە ءبىزدىڭ سپورتشىلارىمىز مەملەكەتتىك تۋىمىزدى جۇرەك تەبىرەنىسىمەن كوتەرىپ, مەملەكەتتىك ءانۇرانىمىزدى كوزدەرىنە جاس الىپ ورىندادى ەمەس پە؟! مەنىڭ ويىمشا, ءبىزدىڭ مەملەكەتتىك رامىزدەر الەمدەگى ەڭ وزىق ۇلگىلەردەن سانالادى, – دەدى سالتاناتتى ميتينگىدە قازاقتىڭ تۇڭعىش عارىشكەرى, كەڭەس وداعىنىڭ باتىرى, حالىق قاھارمانى توقتار اۋباكىروۆ.
مەرەكەلىك شارا ۇلتتىق گۆارديا ۇلاندارى جانە قازاق ەستراداسىنىڭ جۇلدىزدارى – «بايتەرەك» جانە «الامان» توپتارى, تامارا اسار, مارجان اراپباەۆانىڭ قاتىسۋىمەن كونتسەرتكە ۇلاستى. اكتسيانى ۇيىمداستىرۋشىلاردىڭ ءبىرى استانا قالاسى جاستار ساياساتىن قولداۋ مەملەكەتتىك قورىنىڭ ديرەكتورى باقىتجان جۇنىسبەكوۆ: «بەس مىڭنان استام ادام قاتىسقان اكتسيانىڭ ماقساتى – تاۋەلسىز ەلىمىزدىڭ مەملەكەتتىك رامىزدەرىن ناسيحاتتاۋ ارقىلى وتانداستارىمىزدىڭ پاتريوتتىق سەزىمىن ارتتىرۋ» دەپ بۇقارالىق شارانىڭ دىتتەگەن جەردەن شىققانىن ايتىپ, قورىتىندىلادى.
باقىتجان وتارباەۆا